TJM Jańa jyl qarsańynda turǵyndarǵa eskertý jasady

ASTANA. KAZINFORM – Tótenshe jaǵdaılar mınıstrligi Jańa jyl merekesi qarsańynda turǵyndardy órt qaýipsizdigi talaptaryn qatań saqtaýǵa shaqyrdy.

Vedomstvo málimetinshe, mereke kúnderi órt qaýpi arta túsedi. Osyǵan baılanysty qutqarýshylar azamattarǵa qarapaıym qaýipsizdik erejelerin esten shyǵarmaýdy usynady.

Atap aıtqanda, mamandar úıdegi elektr symdarynyń jaramdylyǵyn aldyn ala tekserýge, úı ishinde pırotehnıkalyq buıymdardy qoldanbaýǵa keńes beredi.

Sondaı-aq shyrshany ońaı tutanatyn áshekeılermen bezendirmeý, úıden shyqqanda jáne túngi ýaqytta gırlıandalardy qosýly qaldyrmaý mańyzdy.

Tótenshe jaǵdaılar qyzmeti rozetkalardy shamadan tys júktemeýge, peshtiń jaǵylýyn turaqty baqylap, tútin júretin murjalardy kúıeden ýaqtyly tazartýǵa da nazar aýdardy.

Mınıstrliktiń habarlaýynsha, órt nemese ózge de tótenshe jaǵdaı týyndaǵan kezde azamattar dereý 112 nómirine habarlasýy qajet.

Tótenshe jaǵdaılar mınıstrligi jańa jyl merekesin qaýipsiz ótkizý árbir azamattyń jeke jaýapkershiligi ekenin eske saldy.

Aıta keteıik, Astanada úsh qabatty ǵımarattan órt shyqty.