TJM jańa Tesla Cybertruck kólikterin satyp alady
ASTANA. KAZINFORM – Tótenshe jaǵdaılar mınıstrligi qutqarý bólimshelerine Tesla Cybertruck kólikterin satyp alýdy jalǵastyrady. Bul týraly TJ vıtse-mınıstri Erbolat Sadyrbaev Úkimettegi brıfıngte aıtty.
Vıtse-mınıstrdiń aıtýynsha, buǵan deıin alǵashqy kólikterdi Almaty qalasynyń TJ departamenti satyp alǵan jáne óz tıimdiligin kórsetken.
– Bizdiń mınıstrlik dál osyndaı shuǵyl kómek qajet jaǵdaılarda jumys isteıdi, munda ár mınýt mańyzdy. Tesla Cybertruck ázirge, artyq aıtpaı-aq qoıaıyn, túrli tótenshe jaǵdaılarǵa shyǵý kezinde ózin jetkilikti deńgeıde aqtady. Biz adamdardyń ómirin qutqarý týraly aıtyp otyrmyz, – dedi Erbolat Sadyrbaev tilshi suraǵyna bergen jaýapta.
E. Sadyrbaev mınıstrliktiń avtoparkin jańartý jumystary jalǵasyp jatqanyn, bul rette tehnıkanyń tıimdiligine basymdyq berilip otyrǵanyn atap ótti.
– Bolashaqta bul kólikterdi taǵy satyp alý josparda bar. Jalpy mınıstrlik tehnıkany jańartý saıasatyn júrgizip otyr, munda negizgi nazar onyń tıimdiligine aýdarylady, – dedi ol.
Buǵan deıin Mańǵystaý dalasynda TJM qutqarýshylary Ulybrıtanııadan kelgen týrısterge kómek kórsetken edi.
