TJM jańa oqý ornyn salýdy josparlap otyr
ASTANA. 18 qarasha. QazAqparat - Búginde tótenshe jaǵdaılar salasynda kásibı mamandar jetispeıdi. Osyǵan oraı, biz jańa oqý ornyn salý jónindegi tıisti usynystardy ázirleýdemiz. Bul týraly búgin QR Parlamenti Senatynyń Halyqaralyq qatynastar, qorǵanys jáne qaýipsizdik komıtetiniń ókilderimen bolǵan kezdesýde QR Tótenshe jaǵdaılar mınıstri Vladımır Bojko málim etti.
Mınıstr atap kórsetkendeı, qazirgi kezde mamandardyń kásibı daıyndyǵy osy salanyń basty máselesine aınaldy. Sebebi respýblıkada tótenshe jaǵdaılar qyzmeti boıynsha daıyndaıtyn jáne qaıta daıarlaıtyn arnaıy oqý oryndary tapshy. «Máselen, 9 mln. halqy bar Belarýsta tótenshe jaǵdaılar boıynsha eki joǵary oqý orny bilim berse, 17 mln. azamaty bar Qazaqstanda tek Kókshetaý tehnıkalyq ınstıtýty ǵana jumys isteıdi. Sol sebepti bizge kásibı mamandar jetispeıdi. Qazirgi kezde bizde zamanaýı oqý ornyn salý boıynsha tıisti usynystar bar. Eskızdik joba da daıyn», - deıdi V.Bojko.
Sondaı-aq aǵymdaǵy jyly mınıstrlik Kókshetaý tehnıkalyq ınstıtýtynda qosymsha eki mamandyq boıynsha bilim berýdi qolǵa aldy. Ol - tótenshe jaǵdaılar kezindegi qorǵanys jáne azamattyq qorǵanys. Máselen, azamattyq qorǵanys boıynsha hımıkter men radıatsııalyq qorǵanys boıynsha arnaıy mamandar daıarlanbaq.
