TJM: Jambyldaǵy órtke qajet bolsa tikushqaqtar daıyn tur

NUR-SULTAN. QazAqparat – QR Tótenshe jaǵaılar mınıstrligi Jambyl oblysy Korolevka kentiniń áskerı qoımasyndaǵy órtti sóndirýge tikushaq usynýǵa daıyn. Bul týraly mınıstrliktiń baspasóz qyzmeti málim etti, dep habarlaıdy QazAqparat tilshisi.

«QR Tótenshe jaǵdaılar mınıstrligi Qorǵanys mınıstrliginiń resmı suraý salsa, órtti sóndirý úshin tikushaqtar usynýǵa daıyn», - dep jazylǵan resmı málimette.

Mınıstrliktiń deregi boıynsha, áskerı qoımadaǵy tótenshe oqıǵanyń saldaryn joıýǵa ózge óńirlerden mamandar tartylǵan.

«Almaty qalasynan quramynda 6 tehnıka men jeke quramnyń 22 adamy bar jasaq, Túrkistan qalasynan apattyq medıtsınalyq ortalyqtyń 1 tehnıkasy, Shymkent qalasy tótenshe jaǵdaılar departamentiniń 8 tehnıka men jeke quramnyń 33 adamy bar jasaq jáne mınıstrliktiń apattyq medıtsına ortalyǵynyń qyzmetkerleri kelip jetti. QR Tótenshe jaǵdaılar mınıstrliginiń kúshteri men quraldary qalǵan órt oshaqtaryn sóndirýge, turǵyndardy turaqty ornalasý ornyna qaıtarýǵa jáne temirjol men avtomobıl joldaryn qalpyna keltirýge tartylatyn bolady», - dep jazylǵan baspasóz qyzmetiniń málimetinde.

Apat saldaryn joıýǵa mınıstrlik tarabynan mynadaı kúshter jumyldyrylǵan:

- TJM - 153 qyzmetker, 46 tehnıka,

- PD - 400 qyzmetker, 54 tehnıka,

- №28349 á/b - 8 qyzmetker, 2 tehnıka,

- №5513 á/b - 273 áskerı qyzmetshi, 12 tehnıka,

- Ulttyq gvardııa - 520 adam jáne 250 adam rezervte.

Aıta keteıik, 26 tamyz kúni saǵat 19:00-de Jambyl oblysynyń Baızaq aýdanynda ornalasqan áskerı bólim qoımalarynyń biri órtenip, artynan joıqyn jarylys boldy.

Sońǵy resmı derekter boıynsha, Jambyl oblysyndaǵy jarylystan 4 áskerı qyzmetshi qaza tapqan.

Jambyl oblysy ákiminiń baspasóz qyzmeti aýrýhanada jarylystan zardap shekken 27 adam jatqanyn habarlady. Onyń altaýynyń jaǵdaıy aýyr. Jalpy aýrýhanaǵa 88 adam júgingen.

Prezıdent Qasym-Jomart Toqaev Twitter-de Jambyl oblysyndaǵy jaǵdaı baqylaýǵa alynǵan jazǵan bolatyn.