TJM yqtımal qaýip-qaterler týraly azamattardy der kezinde habardar etý úshin bar múmkindikterdi qarastyrýda - V.Bojko
ASTANA. 27 mamyr. QazAqparat /Aıdar Ospanalıev/ - «Almatyda 1-2 mamyr kúnderi bolǵan jer silkinisi Qazaqstanda sońǵy 5 jyldyń ishinde 70 ret qaıtalanyp otyr.
Alaıda osy jer silkinisiniń eshbirinde de qoǵam arasynda sońǵy jer silkinisi kezindegideı úreılenýshilik bolǵan emes»,- deıdi Tótenshe jaǵdaılar mınıstri Vladımır Bojko. Bul týraly ol búgin Parlament Senatynda ótken «Óńir» depýtattyq tobynyń tótenshe jaǵdaılar salasyndaǵy zańnamany jetildirý men aımaqtaǵy tótenshe jaǵdaılarǵa memleket tarapynan qoldanylyp otyrǵan sharalarǵa qatysty uıymdastyrǵan májilis barysynda aıtty.
Otyrysta 1-2 mamyr kúnderi Almatyda bolǵan jer silkinisi kezinde oryn alǵan problemalar jóninde baıandaǵan V.Bojkonyń sózine qaraǵanda, mınıstrlik Memleket basshysy alǵa qoıǵan mindetterge sáıkes, osy ýaqytta Almaty qalasynyń seısmıkalyq turaqtylyǵyna baılanysty boljam jasap, qaýipti aımaqtardy anyqtaý, sel, zilzala sııaqty apattardan turǵyndardy ýaqytynda habardar etý sııaqty sharalardy júzege asyrýmen aınalysýda.
«Qazirgi tańda biz Baılanys jáne aqparat mınıstrligimen birlese otyryp, respýblıkada baılanys jáne aqparattandyrý qyzmetin jolǵa qoıý jónindegi buıryq boıynsha tıisti jumystar júrgizýdemiz. Turǵyndarǵa tónip turǵan qaýip-qaterlerge baılanysty habarlardyń qandaı tártippen taratylatyndyǵy belgilenedi. Bul, árıne, buryn bizde mundaı júıe bolǵan emes degendi bildirmeıdi. Ondaı júıe bizde boldy. Alaıda biz azamattarymyzdyń qarqyndy ósip kele jatqan kommýnıkatsııalyq múmkindikterin eskere bermeımiz. Osynyń saldarynan eldegi túrli oqıǵalarǵa baılanysty el ishinde alypqashpa áńigimeler de kóp bolyp júr. Biz aldaǵy ýaqytta osyndaı qańqý sózderdiń meılinshe aldyn alýǵa tyrysamyz»,-dedi mınıstr.
Onyń sózinshe, sońǵy ret Almatyda bolǵan jer silkinisi keıingi 5 jyldyń kóleminde 70 ret bolǵan. Alaıda olardyń eshqaısysynda da sońǵy jer silkinisindegideı úreılený bolǵan joq. «Oǵan bálkim, Japonııada bolǵan jaǵdaılar áser etken bolar. Onyń ústine, qazir baılanys ta, ınternet te jedel damyp otyrǵan zaman. Uıaly baılanystyń da múmkindikteri óte zor. «Al bizdiń Baılanys jáne aqparat mınıstrligimen qolǵa alyp otyrǵan aqparattandyrý júıesi baılanys quraldarynyń barlyǵyn qamtıdy»,-dedi V.Bojko.
