TJM turǵyndarmen ınternet arqyly udaıy pikir almasyp otyrý úshin jańa saıt ashpaq
ASTANA. 27 mamyr. QazAqparat /Aıdar Ospanalıev/ - Tótenshe jaǵdaılar mınıstrligi turǵyndarmen tildesip, olardyń muń-muqtajdyqtary jaıynda ınternet arqyly udaıy pikir almasyp otyrý maqsatynda jańa saıt ashpaq.
Bul týraly Tótenshe jaǵdaılar mınıstri Vladımır Bojko búgin Parlament Senatynda ótken «Óńir» depýtattyq tobynyń tótenshe jaǵdaılar salasyndaǵy zańnamany jetildirý men aımaqtaǵy tótenshe jaǵdaılarǵa memleket tarapynan qoldanylyp otyrǵan sharalarǵa qatysty uıymdastyrǵan májilisi barysynda aıtty.
Mundaı saıtty ashýǵa mınıstrlikke turǵyndar tarapynan qoıylatyn saýaldar men ótinishter sanynyń kúrt artýyna baılanysty qoldanystaǵy saıttyń osynshama kóp kúshke shydaı almaı buzylýy sebep bolyp otyr.
Mınıstr sózinde sondaı-aq, elimizde buqaralyq aqparat quraldarynan bólek elektrondy bılbordtardy paıdalana otyryp, halyq kóp jınalatyn oryndarda turǵyndardy tótenshe jaǵdaılar salasyndaǵy aqparattarmen qamtamasyz etetin júıe ornatý qajettigin jetkizdi.
Vladımır Bojkonyń mysal retinde keltirgen málimetterine qaraǵanda, Reseıde halyq kóp jınalatyn oryndarynda tap osyndaı 30 myń bılbord ornalastyrylǵan. Onda Tótenshe jaǵdaılar mınıstrligi turaqty túrde óziniń túrli apattar men jaısyz jaǵdaılarǵa baılanysty aqparattary men azamattardyń qandaı jaǵdaıda ózderin qalaı ustaý qajettigi jónindegi málimetterdi ornalastyryp otyrady.
«Sondaı-aq qazir halyq arasynda tótenshe jaǵdaılarǵa qatysty jalǵan málimetterdi taratý sharalarynyń aldyn alý maqsatynda memlekettik organdar atqaratyn isterdiń júıesi jolǵa qoıylýy tıis. Buǵan qosa kúsh-qýat qurylymdary men olardyń aýmaqtyq organdarynyń syrttan keletin shabýyldar men ózge de yqpaldarǵa tótep bere alatyn arnaıy saıtyn jasaý qajet»,-deıdi V.Bojko.
