TJM tasqynmen kúreske qosymsha ushaq pen tikushaqtar satyp almaqshy
ASTANA. KAZINFORM – Tótenshe jaǵdaılar mınıstri Shyńǵys Árinov Úkimet otyrysynda tasqynmen kúreske qosymsha ushaq pen tikushaqtar satyp alý qajettigin málim etti.
Vedomstvo basshysy kóktemdegi tasqyn saldaryn talqylaı kele birneshe keshendi sharany qolǵa alǵandaryn aıtty.
«Birinshi, qutqarýshylardy arnaıy kıim-keshekpen jáne qural-jabdyqtarmen qamtamasyz etý tásilderi qaıta qaralýda. Satyp alynatyn kıim sapaly jáne tapsyrmalardy oryndaýǵa yńǵaıly qımyl qozǵalysqa qolaıly bolýy kerek. Ekinshi, sapaly arnaıy avtomobılder men ınjenerlik tehnıkalar, onyń ishinde júzý quraldaryn, ushaqtar men tikushaqtar satyp alynady. Biz ushqyshtardy túnde jáne qolaısyz aýa raıy jaǵdaıynda ushýǵa oqytyp úıretýdi josparlap otyrmyz», - dedi Shyńǵys Árinov.
Onyń aıtýynsha, búginge deıin nazardan tys qalyp, qolaıly jaǵdaı jasalmaǵan qutqarý bólimshelerine erekshe kóńil bóline bastaǵan.
«Osyǵan baılanysty, jańa tásilge boı buryp, órt sóndirýshiler, medıtsına qyzmetkerleri men qutqarýshylar bir jerge ornalasqan biregeı órt sóndirý deposy qurylýda. Bul shuǵyl áreket etýdi arttyrýǵa jáne azamattardy der kezinde qutqarý sharalaryn qabyldaý múmkindigin beredi», - dedi mınıstr.
