TJM tabıǵatta jáne sý jaǵasynda qaýipsizdik erejelerin saqtaýǵa shaqyrady
ASTANA. KAZINFORM – Jyly kúnderdiń jáne órt qaýpi joǵary maýsymnyń bastalýymen tabıǵı órttiń týyndaý qaýpi artady.
Osyǵan baılanysty TJM azamattardy órt qaýipsizdigi talaptaryn qatań saqtaýǵa jáne ashyq otty paıdalanýǵa jaýapkershilikpen qaraýǵa shaqyrady.
— Senbilikterdi ótkizý, úı mańyndaǵy aýmaqtardy, baqsha jáne saıajaı ýchaskelerin tazalaý kezinde erekshe saq bolý kerek. Qurǵaq, ystyq jáne jeldi aýa raıynda ot pen qoqystardy jaǵýǵa tyıym salynady, — delingen habarlamada.
Aýa raıy qolaıly bolǵan jaǵdaıda ǵımarattar men qurylystardan keminde 50 metr qashyqtyqta, osy maqsattar úshin arnaıy bólingen oryndarda jáne turaqty baqylaýda ot jáne qaldyqtardy jaǵýǵa jol beriledi.
Mangaldy (barbekıý, grıl) ǵımarattar men qurylystarǵa deıin 10 metrden jaqyn emes qashyqtyqta paıdalanýǵa ruqsat etiledi, sondaı-aq oryndy órt sóndirgishpen nemese keminde 10 lıtr sýy bar syıymdylyqpen jabdyqtaý qajet.
TJM eske salady:
- sóndirilmegen temeki tuqyldaryn, sirińkelerdi, otty tastamańyzdar;
- qurǵaq shópti órtemeńizder;
- úıdiń nemese saıajaıdyń aýmaǵyn qurǵaq shóp pen janǵysh qoqystardan únemi tazalańyzdar;
- balalardyń otpen oınaýyna jol bermeńizder.
— Sý aıdyndarynda qaýipsizdik erejelerin saqtaý qajettigin eske salamyz. Balalardy sý mańynda, ásirese kún jylynǵan kezeńde jáne tabıǵat aıasynda belsendi demalys kezinde qaraýsyz qaldyrmańyz, — delingen mınıstrlik habarlamasynda.
Aıta ketelik «Aqjaıyq» rezervatyndaǵy qamys órti sóndirilgenmen, aýmaq byqsyp jatyr.
