TJM tabıǵat aıasynda demalýshylardy órt qaýipsizdigi talaptaryn saqtaýǵa shaqyryp otyr

«Ulttyq saıabaqtar men orman ishinde, dalaly alqaptarda demalatyn elimizdiń barlyq azamattary men qonaqtaryn órt qaýipsizdigi talaptaryn saqtaýǵa shaqyramyn. Sebebi, búginde óte joǵary órt qaýiptiligi bar. Kez kelgen sóndirilmegen ot nemese avtokólik terezesinen tastalǵan temeki tuqyly úlken saldarǵa ákelýi múmkin. Demalys ornynan keter aldynda otty muqııat óshirip, buǵan saqtyqpen qaraǵan jón»,- dedi QR Tótenshe jaǵdaılar vıtse-mınıstri Valerıı Petrov Úkimette ótken selektorlyq keńesten keıin.

Bıylǵy jyldyń 7 aıynda memlekettik orman qory aýmaǵynda 363 órt tirkeldi. Osy órttiń saldarynan tilsiz jaý sharpyǵan aýmaqtyń jalpy aýdany 4 myń gektar jerdi qamtyǵan, sondaı-aq materıaldyq shyǵyn 35 mıllıon teńgeden astam qarjyny quraıdy. Respýblıkanyń jazyq jerlerinde jalpy aýmaǵy 55 myń gektar alqapqa jaıylǵan 169 órt tirkeldi. Osynyń saldarynan kelgen shyǵyn 4 mıllıon teńgeni qurady.

Aıta keteıik, búgin Úkimette ótken selektorlyq keńeste Premer-Mınıstr Kárim Másimov orman aýmaqtarynyń qasaqana órtelýine jol bermes úshin bul máseleni aıryqsha baqylaýǵa alýdy tapsyrdy. «Men áriptesterimmen tıisti áńgime júrgizdim. Aǵashtardy kesý úshin kóbine ormandy qasaqana órteıdi. Osynyń tóńireginde ózindik bıznes bar kórinedi. Sondyqtan bul másele aıyryqsha baqylaýda bolýy shart», - dep atap ótti Úkimet basshysy.