TJM sýǵa shomylý kezinde saqtalýy tıis qaýipsizdik erejelerin eske saldy
ASTANA. KAZINFORM – Shomylý maýsymynda sý aıdyndaryndaǵy jazataıym oqıǵalardyń basym bóligi tyıym salynǵan jáne shomylýǵa jabdyqtalmaǵan jerlerde bolady. Osyǵan baılanysty Tótenshe jaǵdaılar mınıstrligi turǵyndardy sýdaǵy qaýipsizdik talaptaryn qatań saqtaýǵa shaqyrdy.
– Balalardy sý aıdyndarynyń janynda qaraýsyz qaldyrmańyz jáne eresekterdiń baqylaýynsyz shomylýyna jol bermeńiz. Tyıym salynǵan jáne shomylýǵa jabdyqtalmaǵan oryndarda, sondaı-aq «Shomylýǵa tyıym salynady», «Súńgýge tyıym salynady», «Qaýipti! Iirim» belgileri qoıylǵan jerlerde shomylmańyz, – dep eskertti TJM.
Sondaı-aq mas kúıde sýǵa túsýge, shomylý aýmaǵyn belgileıtin qalqymalardan asyp júzýge jáne shaǵyn kólemdi kemeler men ózge de júzý quraldaryna jaqyndaýǵa bolmaıdy.
Mınıstrlik tekserilmegen jáne jabdyqtalmaǵan jerlerde sýǵa súńgýden, júzýge arnalmaǵan zattardy paıdalanýdan bas tartýǵa shaqyrady.
– Qaıyqtardan, katerlerden, aılaqtardan, tabıǵı jartastardan, tastardan, qorshaýlardan jáne osy maqsatqa arnalmaǵan ózge de qurylystardan sýǵa sekirmeńiz, – delingen habarlamada.
TJM sýdaǵy qaýipsizdik qarapaıym erejelerdi saqtaýdan bastalatynyn jáne ásirese balalardy únemi eresekterdiń baqylaýynda ustaý qajettigin eske saldy.
Aıta keteıik, Pavlodarda Sátbaev atyndaǵy kanalda er adam sýǵa batyp ketti.
