TJM: Sýǵa ketken balalardyń 82 paıyzynda ata-anasy qaraýsyz qaldyrǵan

NUR-SULTAN. QazAqparat – Elimizde balalardyń sýǵa ketýiniń negizgi sebebi ata-ananyń qaraýsyz qaldyrýynan bolyp otyr. Bul týraly QR Tótenshe jaǵdaılar mınıstrligi Azamattyq qorǵanys jáne áskerı bólimder komıtetiniń basqarma basshysy Qanat Turysbaev málim etti, dep habarlaıdy QazAqparat tilshisi.

«Sý aıdyndarynda balalardyń qaza bolý jaǵdaıynyń 82%-y ata-analardyń qaraýsyz qaldyrýy saldarynan bolyp otyr. Bıyl eń kóp sýǵa ketý derekteri tirkelgen aımaqtarǵa toqtalsaq, aldymen Almaty oblysy – 45 adam, onyń ishinde 12 bala, ekinshi kezekte Shyǵys Qazaqstan oblysy – 36 adam, onyń ishinde 10 bala sýdan ajal qushty. Adamdardyń sýǵa ketip qaıtys bolýynyń negizgi sebepterine toqtalyp ótsem. Shomylý kezinde kúshi men qabiletin baǵalamaý – 141 jaǵdaı, mas kúıinde shomylý – 65 jaǵdaı, sýǵa qulaý – 57 jaǵdaı, júze almaý – 30 jaǵdaı, balyq aýlaý kezinde qaýipsizdik qaǵıdalaryn buzý – 12 jaǵdaı, sýǵa batyp jatqan adamdardy qutqarý kezinde-12 jaǵdaı jáne júzý quraldaryn paıdalaný kezinde qaýipsizdik qaǵıdalaryn buzý - 7 jaǵdaı», - dedi dedi Qanat Turysbaev OKQ-de ótken baspasóz máslıhatynda.

Sondaı-aq, basqarma basshysynyń málimdeýinshe, shomylý maýsymy aıaqtalsa da sý aıdyndarynda adam óliminiń aldyn alý boıynsha profılaktıka jalǵasyp jatyr. Sebebi elimizde kúzgi ań jáne balyq aýlaý maýsymy bastalady.

Buǵan deıin TJM ókili shomylý maýsymynyń qorytyndysymen tanystyrdy. Ókinishke qaraı, bıyl 319 qazaqstandyqtyń ajaly sýdan keldi.