TJM: Sýdaǵy qaýipsizdik talaptaryn buzǵandarǵa 25 mln teńge aıyppul salyndy
ASTANA. KAZINFORM – Qazaqstanda bıylǵy shomylý maýsymy bastalǵaly sýdaǵy qaýipsizdikti qamtamasyz etý sharalary kúsheıtildi. Osy ýaqyt ishinde 36 myńnan astam reıd pen patrýldeý júrgizilip, qaýipsizdik talaptaryn buzǵan 1 780 adam ákimshilik jaýapkershilikke tartyldy.
Bul týraly QR Tótenshe jaǵdaılar mınıstrligi Kazinform agenttiginiń resmı saýalyna bergen jaýabynda málim boldy. Mınıstrliktiń málimetinshe, shomylý maýsymy bastalǵaly sý aıdyndarynda TJM qyzmetkerleri, jergilikti atqarýshy organdar men volonterlerdiń qatysýymen kún saıyn reıdtik is-sharalar men patrýldeý júrgizilip keledi.
– Bıyl barlyǵy 36 myń reıdtik is-shara men patrýldeý júrgizildi. Sonyń nátıjesinde 1 780 quqyq buzýshy ákimshilik jaýapkershilikke tartylyp, olarǵa jalpy somasy 25 mıllıon teńge aıyppul salyndy, – delingen mınıstrliktiń jaýabynda.
TJM málimetinshe, reıdter men patrýldeý jumystary shomylý maýsymy aıaqtalǵanǵa deıin jalǵasady. Sonymen qatar sý aıdyndaryndaǵy qaýipsizdik ınfraqurylymy da kezeń-kezeńimen jańartylyp jatyr.
Óńirlerdi damytýdyń 2026–2027 jyldarǵa arnalǵan keshendi jospary aıasynda Ulytaý oblysynyń Jezqazǵan qalasynda, Almaty oblysynyń Qonaev qalasynda, Abaı oblysynyń Semeı qalasynda, Şýche kóli jaǵalaýynda jáne Aqmola oblysynyń Qosshy qalasynda bes jedel-qutqarý jasaǵyn salý josparlanǵan.
Budan bólek, sýdaǵy qaýipsizdikti kúsheıtý maqsatynda 10 qutqarý bólimshesi men posty ashyldy. Onyń jeteýi týrıstik aımaqtarda ornalasqan.
Mınıstrliktiń málimetinshe, sońǵy eki jylda qutqarý bólimsheleri 36 zamanaýı júrdek katermen jabdyqtaldy.
– Bul tótenshe jaǵdaılarǵa jedel den qoıý ýaqytyn qysqartyp, sýdaǵy avarııalyq-qutqarý jumystaryn tıimdi júrgizýge múmkindik beredi, – delingen mınıstrliktiń jaýabynda.
Eske salaıyq, buǵan deıin Tótenshe jaǵdaılar mınıstrligi bıyl sýǵa ketýmen baılanysty qaıǵyly oqıǵalardyń basym bóligi shomylýǵa tyıym salynǵan jerlerde, ásirese ózenderde tirkelgenin málimdegen bolatyn.
