TJM sý tasqynyna qatysty sońǵy derekterdi jarııa etti
ASTANA. KAZINFORM – Batys Qazaqstan oblysynda Jaıyq ózeniniń sý deńgeıiniń kóterilýi saqtalýda. Bul týraly TJM ókili Asqar Shárip aıtty.
«Azamattyq qorǵaý qyzmetteri, volonterler jáne tartylǵan uıymdar Atyraý, Aqtóbe, Batys Qazaqstan, Soltústik Qazaqstan oblystarynda sý tasqynyn joıý jáne halyqqa kómek kórsetý boıynsha jumystaryn jalǵastyryp jatyr. Batys Qazaqstan oblysynda Jaıyq ózeninde sý deńgeıiniń kóterilýi saqtalýda. Jumyldyrylǵan kúshter men quraldar qapshyqtardy tóseý, qorǵaý bógetterin salý jáne sý basqan aýmaqtan sý sorý jumystaryn jalǵastyrýda. Barlyq kezek kúttirmeıtin sharalar qabyldanýda», - dedi ol Ortalyq kommýnıkatsııalar qyzmetindegi brıfıngte.
Onyń aıtýynsha, Atyraý oblysynda Jylyoı aýdanynyń Qulsary qalasynda sý basqan úıler men aýmaqtardan sýdy sorý jáne sýdyń baǵytyn burý, Jaıyq ózeni boıynda jaǵalaýdy bekitý jumystary júrgizilip jatyr. Soltústik Qazaqstan oblysynda da sý tasqyny jaǵdaıy turaqty bolǵanymen áli de kúrdeli. Sý basqan úıler men aýmaqtardan sýdy sorý jumystary, Esil ózenindegi sýdyń deńgeıine monıtorıng jalǵasýda.
«Respýblıka boıynsha 26 785 adam óz úılerine oraldy. 8 795 adam, onyń ishinde 3 828 bala evakýatsııalaý pýnktterinde. 4 708 turǵyn úı men 2 774 aýla aýmaǵynan sýdyń baǵyty burylyp, sý soryldy», - dedi Asqar Shárip.
