TJM: Sońǵy úsh jylda qaýipti óndiristik nysandarda 67 apat tirkeldi

ASTANA. KAZINFORM — Qazaqstanda memlekettik baqylaý aıasynda shamamen 10 myń ónerkásiptik kásiporyn jáne 200 myńnan astam qaýipti óndiristik obekt tirkelgen. Bul týraly QR Tótenshe jaǵdaılar mınıstriniń orynbasary Erbolat Sadyrbaev habarlady.

— Qaýipti óndiristik obektilerdiń eń kóp sany munaı-gaz óndirý salasynda — 71 158. Kótergish qurylǵylar — 26 014, munaıhımııa jáne munaı óńdeý — 20 468, taý-ken ónerkásibi — 18 407, qazandyq sharýashylyǵy — 17 484 nysan, — dedi Erbolat Sadyrbaev Ortalyq kommýnıkatsııalar qyzmetindegi baspasóz máslıhatynda.

Vıtse-mınıstrdiń aıtýynsha, arnaıy komıtet pen aýmaqtyq bólimsheler 11 memlekettik qyzmet kórsetedi. 2025 jyly barlyǵy 11 685 memlekettik qyzmet kórsetilgen.

— Sońǵy úsh jylda qaýipti obektilerde 67 apat tirkeldi. Eń kóp apat taý-ken salasynda — 10, munaı-gaz óndirýde — 14, gaz sharýashylyqtarynda — 10, kótergish qurylǵylarda — 11 boldy. Bul ónerkásiptik qaýipsizdikti júıeli baqylaýdyń mańyzdy ekenin kórsetedi, — dedi ol.

Aıta keteıik, buǵan deıin TJM turǵyndardy aıaz kezinde órt qaýipsizdigi erejelerin saqtaýǵa shaqyrǵan bolatyn.