TJM shomylý maýsymynda sýdaǵy qaýipsizdik erejelerin saqtaýǵa shaqyrdy
ASTANA. KAZINFORM – Tótenshe jaǵdaılar mınıstrligi shomylý maýsymynda sýdaǵy jazataıym oqıǵalardyń aldyn alý maqsatynda profılaktıkalyq jumysty kúsheıtip, azamattardy qaýipsizdik qaǵıdalaryn qatań saqtaýǵa shaqyrdy.
Vedomstvonyń málimetinshe, qutqarýshylar sý aıdyndarynda túsindirý jumystaryn júrgizip, balalardyń qaýipsizdigine erekshe nazar aýdaryp jatyr.
«Balalardy sý aıdyndarynyń janynda qaraýsyz qaldyrmańyz jáne eresekterdiń baqylaýynsyz shomylýyna jol bermeńiz. Beıtanys ári shomylýǵa jabdyqtalmaǵan oryndarda, sondaı-aq "Shomylýǵa tyıym salynady", "Súńgýge tyıym salynady", "Qaýipti! Iirim" belgileri qoıylǵan jerlerde sýǵa túspeńiz», – dep eskertti TJM.
Mınıstrlik sondaı-aq alkogoldik masań kúıde sýǵa túspeýge, shomylý aýmaǵyn belgileıtin qalqymalardan asyp júzbeýge, shaǵyn kólemdi kemeler men ózge de júzý quraldaryna jaqyndamaýǵa shaqyrdy.
Budan bólek, tekserilmegen jerlerde sýǵa súńgýden, júzýge arnalmaǵan zattardy paıdalanýdan jáne qaıyqtardan, aılaqtardan, jartastar men basqa da arnalmaǵan oryndardan sýǵa sekirýden bas tartý qajettigi aıtyldy.
«Árbir azamat sý aıdyndaryndaǵy qaýipsizdik erejelerin qatań saqtaýy tıis. Osy qarapaıym qaǵıdalardy saqtaý sizdiń jáne jaqyndaryńyzdyń ómiri men densaýlyǵyn saqtaýǵa múmkindik beredi», – dep habarlady vedomstvo.
Aıta keteıik, Petropavldaǵy Pestroe kólinde er adam sýǵa tunshyǵyp, kóz jumdy.
