TJM: Shomylý maýsymy bastalǵaly beri 10 adam sýǵa ketti
ASTANA. KAZINFORM — Bul týraly Ortalyq kommýnıkatsııalar qyzmetinde «Shomylý maýsymyndaǵy qaýipsizdikti qamtamasyz etý» taqyrybynda ótken baspasóz konferentsııasynda QR Tótenshe jaǵdaılar mınıstrligi Tótenshe jaǵdaılardyń aldyn alý komıteti tóraǵasynyń orynbasary Áset Jylqaıdarov aıtty.
– Bıylǵy shomylý maýsymy bastalǵaly beri elimizdiń sý aıdyndarynda 10 adam, onyń ishinde 7 bala sýǵa batyp kóz jumdy. Adamdardyń qaza bolýyna negizinen júze almaýy, óz múmkindigin durys baǵalamaýy, balalardy eresekterdiń qaraýynsyz qaldyrýy jáne demalys kezinde alkogoldik ishimdik iship, mas kúıde sýǵa túsýi sebep bolyp otyr, - dedi spıker.
Mınıstrlik ókilderiniń aıtýynsha, jazataıym oqıǵalardyń basym bóligi shomylýǵa tyıym salynǵan oryndarda tirkelgen. Osyǵan baılanysty jergilikti atqarýshy organdarmen birlesip, ruqsat etilgen jaǵajaılar sanyn arttyrý jumystary júrgizilip jatyr.
– Qazirgi ýaqytta sý aıdyndarynda qaýipsizdik sharalary kúsheıtildi. Jyljymaly beketter qoıylyp, jappaı demalys oryndarynda patrýldeý uıymdastyryldy. Sondaı-aq aqparattyq stendter men eskertý belgileri ornatylyp, reıdtik is-sharalar júrgizilip jatyr, - dedi tóraǵa orynbasary.
Mınıstrlik málimetinshe, sý aıdyndarynda tótenshe jaǵdaılardyń aldyn alý maqsatynda buqaralyq aqparat quraldary arqyly túsindirý jumystary júrgizilip, 23 myńnan astam reıd pen patrýldeý uıymdastyrylǵan.
Tótenshe jaǵdaılar mınıstrligi azamattarǵa balalardy qaraýsyz qaldyrmaýdy, tyıym salynǵan jerlerde sýǵa túspeýdi, alkogoldik ishimdik ishken kúıde shomylmaýdy jáne belgilengen shomylý aımaǵynan shyqpaýdy eskertti.
Eske salaıyq, buǵan deıin Almatyda sýǵa túsýge tyıym salynǵan sý aıdyndary atalǵan edi.
