TJM respýblıka boıynsha órt qaýipsizdigi erejesiniń saqtalýyn qadaǵalaý maqsatynda tekserý jumystaryn júrgizýde
ASTANA. Jeltoqsannyń 24-i. QazAqparat /Marlan Jıembaı/ - Qazirgi ýaqytta QR Tótenshe jaǵdaılar mınıstrligi (TJM) respýblıka boıynsha kóńil kóterý oryndarynda jáne adamdar kóp jınalatyn basqa da nysandarda órt qaýipsizdigi erejesiniń saqtalýyn qadaǵalaý maqsatynda jospardan tys tekserý jumystaryn júrgizýde.
Bul týraly búgin QR TJM-de ótken baspasóz máslıhatynda atalǵan mınıstrliktiń baspasóz qyzmeti basshysynyń mindetin atqarýshy Eldar Raıymbekov málim etti.
Onyń aıtýynsha, jeltoqsannyń 23-indegi jaǵdaı boıynsha memlekettik órtke qarsy qyzmettiń mamandary 1909 kóńil kóterý ornynda, onyń ishinde 400 meıramhana, 1038 kafe men bar, 174 túngi klýb jáne osy sanattaǵy 297 mekemede órt qaýipsizdiginiń saqtalýyna tekserý jumystaryn júrgizgen. Tekserý qorytyndysynda 915 ákimshilik is qaralyp, órt qaýipsizdigi erejeleriniń talaptaryn buzǵany úshin 908 adam jalpy somasy 7 mln. 921 myń teńge kóleminde ákimshilik jaýapkershilikke tartylǵan.
«Biz jeltoqsannyń 25-inen Іshki ister mınıstrligimen birlese otyryp, pırotehnıkalyq zattardyń saqtalatyn jáne satylatyn oryndaryna arnaıy tekserý jumystaryn júrgizemiz. Bul shara qańtar aıynyń 13-ine deıin jalǵasady», dedi E.Raıymbekov.
