TJM: Ótken jyly qutqarýshylar 276 adamnyń ómirin saqtap qaldy
ASTANA. KAZINFORM – Qazaqstanda sý aıdyndaryndaǵy qaýipsizdikti qamtamasyz etý jáne tótenshe jaǵdaılardyń aldyn alý baǵytynda atqarylǵan jumystardyń nátıjesinde ótken jyly 276 adam qutqaryldy.
Bul jóninde OKQ ótken baspasóz májilisinde QR Tótenshe jaǵdaılar mınıstrligi Tótenshe jaǵdaılardyń aldyn alý komıteti tóraǵasynyń orynbasary Áset Jylqaıdarov aıtty.
– Qabyldanǵan sharalardyń nátıjesinde ótken jyly 276 adam qutqaryldy, onyń 85-i - bala. Qutqarý jumystary sý aıdyndarynda, jappaı demalys oryndarynda jáne qaýipti ýchaskelerde júrgizildi, - dedi mınıstrlik ókili.
Mınıstrlik óńirlerdiń ákimdikterimen birlesip qaýipsizdik ınfraqurylymyn kezeń-kezeńimen damytý sharalaryn qarastyryp jatyr. Atap aıtqanda, eń kóp kelýshiler baratyn demalys oryndarynda qutqarý stantsııalaryn salý jáne olardy jabdyqtaý jumystary jalǵasýda, sondaı-aq shtat bilikti kásibı qutqarýshylarmen tolyqtyrylýda.
– Jyl saıyn shomylý maýsymy kezeńinde sýdaǵy demalys oryndarynda akvatorııalardy patrýldeýdi júzege asyratyn 200-ge jýyq jyljymaly qutqarý beketi qurylady, - dedi spıker.
TJM azamattardy sýdaǵy qaýipsizdik erejelerin qatań saqtaýǵa, balalardy qaraýsyz qaldyrmaýǵa jáne tyıym salynǵan jerlerde shomylmaýǵa shaqyrdy.
Aıta keteıik, bıyl shomylý maýsymy bastalǵaly beri 10 adam sýǵa ketti.
