TJM órt sóndirý tehnıkasynyń tapshylyǵy men tozýy týraly pikir bildirdi
ASTANA. QazAqparat – Tótenshe jaǵdaılar vıtse-mınıstri Marat Kúldikov órt sóndirý tehnıkasynyń tapshylyǵy men tozýy týraly jýrnalıster suraǵyna jaýap berdi, dep habarlaıdy QazAqparat tilshisi.
«Shynynda da tehnıkanyń jetispeýshiligi máselesi bar, biraq qazirgi ýaqytta tehnıkanyń jabdyqtalýy – 89%, onyń ishinde 440 tehnıkaǵa qosymsha qajettilik bar. Úsh jyl ishinde biz 242 tehnıka satyp aldyq, bıyl 180-ge jýyq tehnıka alýdy josparlap otyrmyz. Jergilikti atqarýshy organdarǵa da tehnıka beremiz, biraq olardyń ózderi de TJM-ge qaramaı, qosymsha tehnıkany satyp alýy kerek. Eger ákimdik te tehnıkany satyp alsa, eshqandaı problema bolmas edi», - dep túsindirdi Marat Kúldikov Ortalyq kommýnıkatsııalar qyzmetinde.
Sonymen birge, vıtse-mınıstr keıbir kezekshi bólimderde jarty ǵasyrdan astam ýaqyt boıy qoldanylyp kele jatqan tehnıka týraly aqparatty teriske shyǵardy.
«Joq, bulaı dep aıtý múmkin emes. Men tehnıkanyń jabdyqtalýy 89% ekenin aıttym. Iá, bizde 10 jyldan astam ýaqyt qoldanylǵan eski tehnıka bar, biraq olardyń sany kóp emes. Eger úsh jyl boıy dál qazirgideı qarjylandyratyn bolsaq, 3-4 jyl ishinde tolyq qajettiligimizdi jabamyz», - dedi Marat Kúldikov.
