TJM: Órt sóndirý bólimsheleriniń tehnıkamen jabdyqtalý deńgeıi 80 paıyzǵa jetti

ASTANA. QazAqparat – Bıyl órt sóndirý bólimsheleri bıýdjet arqyly 200-ge jýyq tehnıka satyp alady. Bul týraly Órtke qarsy qyzmet komıtetiniń tóraǵasy Nurbolat Derbisov ortalyq kommkýnıkatsııalar qyzmetinde ótken brıfıngide aıtty, dep habarlaıdy Qazaqparat tilshisi.

«Órt qaýpi bar maýsym aldynda saladaǵy tehnıka men qural-jabdyq tapshylyǵy qandaı?», - dep surady BAQ ókili.

Nurbolat Derbisovtiń málimeti boıynsha, órt sóndirýshi jasaqtardyń ıeliginde túrli fýnktsıonaldyq maqsattaǵy 3000-nan astam órt sóndirý tehnıkasy bar.

«Qazirgi tańda ónt sóndirý quramynyń jabdyqtalý deńgeıi – 80 paıyz. TJM óńirlik bólimsheleriniń tehnıkalyq parkin jańartý jumystary kezeń-kezeńmen, respýblıkalyq jáne jergilikti bıýdjetterden bólingen aqshanyń mólsherine qaraı júrip jatyr. Keıingi 3 jylda bizdi bul turǵyda jergilikti ákimdikter de, respýblıkalyq bıýdjet te jaqsy qoldap otyr.

Keıingi 3 jylda 600-den astam órt sóndirý tehnıkasyn aldyq. Bıyl 86 tehnıkany respýblıkalyq bıýdjet arqyly, 100 tehnıkany jergilikti bıýdjetter qoldaýymen alamyz. Tehnıkamen jabdyqtaý máselesi kezeń-kezeńmen sheshilip jatyr dep aıtýǵa bolady. 2018-2019 jyldarmen salystyrsaq, keıingi úsh jylda jaqsy alǵa jyljý bar», - dedi TJM ókili.