TJM órt qaýpi kezeńi aıaqtalǵanǵa deıin ańshylyq maýsymdy ashý merzimin shegere turýdy usyndy

Bul usynysty búgin Úkimet úıinde QR Premer-Mınıstriniń birinshi orynbasary Ómirzaq Shókeevtiń tóraǵalyǵymen ótken selektorlyq keńes barysynda QR Tótenshe jaǵdaılar vıtse-mınıstri Valerıı Petrov jasady.

«Tótenshe jaǵdaılar mınıstrligi oryn alǵan jaǵdaıǵa baılanysty órt qaýpi kezeńi aıaqtalǵanǵa deıin ańshylyq maýsymynyń ashylý merzimin shegere turý maqsatty dep sanaıdy. Óıtkeni, biz ańshylyq degendi jáne onyń qandaı saldarynyń bolatyndyǵyn da bilemiz. Sondyqtan bundaı usynysty yqtımal órt tutaný oqıǵalaryn meılinshe tómendetý maqsatynda usynyp otyrmyz», dedi.

V.Petrovtyń alǵa tartqan derekterine qaraǵanda, sońǵy bir aptanyń ishinde respýblıka boıynsha jalpy aýmaǵy 7800 gektardy quraıtyn 59 dala órti tirkelgen. Onyń 45-i Aqtóbe, 7-eýi Qaraǵandy oblysyna tıesili. Sondaı-aq Atyraý, Batys Qazaqstan jáne Ońtústik Qazaqstan oblystarynda da ekiden órt oqıǵasy oryn alǵan.