TJM ókilderi elimizdiń sý aıdyndarynan 600-den astam quqyqbuzýshylyq anyqtady
ASTANA. KAZINFORM - Sý aıdyndaryndaǵy jazataıym oqıǵalar men adam óliminiń aldyn alýǵa, sondaı-aq azamattardyń qaýipsiz minez-qulyq mádenıetin arttyrýǵa baǵyttalǵan «Qaýipsizdik azımýty» respýblıkalyq profılaktıkalyq aktsııasy júrip jatyr.
QR Tótenshe jaǵdaılar mınıstrligi baspasóz qyzmetiniń habarlaýynsha, 1 shilde men 10 tamyz aralyǵynda 610 ákimshilik quqyqbuzýshylyq anyqtalyp, olar boıynsha jalpy somasy 9 446 231 teńge kóleminde aıyppul salyndy.
-TJM azamattardy tek ruqsat etilgen oryndarda demalýǵa, balalardy qaraýsyz qaldyrmaýǵa, qutqarý keýdeshelerin paıdalanýǵa, shaǵyn kólemdi kemelerdi paıdalaný qaǵıdalaryn saqtaýǵa jáne aýa raıy qolaısyz bolǵan jaǵdaıda sýǵa shyqpaýǵa shaqyrady,-delingen habarlamada.
Osyǵan deıin shomylýǵa tyıym salynǵan jerde sýǵa túsken astanalyq jazalanǵany týraly jazdyq.
