TJM mınıstri Aqtóbede shahtaǵa túsip, qaýipti aımaqtan shyǵý baǵyttaryn tekserdi
ASTANA. KAZINFORM — Tótenshe jaǵdaılar mınıstri Murat Muhanov Aqtóbe oblysyna jumys sapary barysynda «Qazhrom» transulttyq kompanııasy» AQ fılıaly — Don taý-ken baıytý kombınatynyń «Bolashaq» shahtasyn tekserdi.
TJM baspasóz qyzmetiniń málimetinshe, tekserýge kásiporyn basshylyǵy qatysty. Mınıstr hrom kenin óndirý kezindegi ónerkásiptik qaýipsizdik sharalarymen tanysty.
Shahtaǵa túser aldynda mınıstrge avarııalardy joıý jospary, jeke ózin-ózi qutqarý quraldaryn paıdalaný tártibi jáne qaýipti aımaqtan shyǵý baǵyttary tanystyryldy.
Dıspetcherlik bólimde jumysshylarmen baılanystyń qalaı qamtamasyz etiletini jáne avarııalyq dabyl kezinde dıspetcherdiń qandaı áreket jasaıtyny kórsetildi.
Odan keıin TJM delegatsııasy mınýs 400 metr deńgeıine tústi. Munda gazsyzdandyrý kamerasy tekserilip, gazdy burý úshin uńǵymalardy burǵylaý jumystarynyń barysymen tanysty. Mınýs 480 metr deńgeıinde mınıstrge ken óndirý ýchaskesi, jeldetý júıesiniń jumysy, jaryqtandyrý jáne baılanys quraldary kórsetildi.
Qyzmetkerler men tehnıkanyń ornalasqan jerin personal men tehnıkany pozıtsııalaý júıesi (PPTJ) baqylaıdy. Onyń derekteri dıspetcherlik bólimge kelip túsip, MinePass baǵdarlamasynda kórsetiledi. «Lých-4» shamdary jer astyndaǵy adamdardyń ornalasqan jerin anyqtaýǵa múmkindik beredi.
Gaz jaǵdaıyn statsıonarlyq «Senson» gaz taldaǵyshtary baqylaıdy, al qosymsha ólsheýlerdi gaz ólsheýshiler men taý-ken sheberleri júrgizedi. Yqtımal avarııa kezinde adamdardyń ornalasýy jáne aýa quramynyń jaı-kúıi týraly málimetter shahta qyzmetterine taý-ken qazbalaryndaǵy jaǵdaıdy baǵalaýǵa múmkindik beredi.
Osyǵan deıin Dımash Qudaıbergen Qaraǵandyda shahtaǵa túsip, balalarmen jáne sýretshi Kúıikovpen kezdeskenin jazǵanbyz.
