TJM mereke qarsańynda gaz ballondary qaýipsizdigin eske saldy

NUR-SULTAN. QazAqparat – Tótenshe jaǵdaılar mınıstrligi jeltoqsandaǵy merekeler qarsańynda turǵyndardy gaz ballonyn paıdalanýdaǵy qaýipsizdikti saqtaýǵa shaqyrdy, dep habarlaıdy QazAqparat.

«Jeltoqsandaǵy merekeler qarsańynda turmystyq ballondarda suıytylǵan gazdy paıdalanatyn turǵyndardan ballondy qosar aldynda gazdyń kemýin tekserýdi, qysym rettegishiniń jaı-kúıin tekserýdi, gaz ıisi baıqalǵanda ashyq otty paıdalanbaýdy, temeki shekpeýdi, elektr aspaptaryn ajyratýdy suraımyn. Turmystyq ballondardy jylytpaý qajet jáne jylytý aspaptarynyń janyna ornatpaý kerek», - dedi QR Tótenshe jaǵdaılar vıtse-mınıstri Mereke Pishembaev Ortalyq kommýnıkatsııalar qyzmetinde ótken baspasóz máslıhatynda.

Sonymen birge, mınıstrlik ókili avtogaz quıý stantsııalarynda turmystyq gaz ballondaryn toltyrmaýdy eskertti, óıtkeni bul turmystyq ballondar men gazben jabdyqtaý júıeleri obektilerin qaýipsiz paıdalaný talaptaryna qaıshy keledi.

«Budan basqa, avtogaz quıý stantsııalarynyń ıelerine turmystyq gaz ballondaryn toltyrǵany úshin ákimshilik jaýapkershilik bar ekenin jáne stantsııalarda osyndaı faktilerge jol bermeý týraly aqparattyq stendterdi ornalastyrý qajettigin eskertemiz. Al gaz toltyrý stantsııalarynyń ıelerine turmystyq gaz ballondaryn, onyń ishinde tómen temperatýra kezeńinde paıdalaný qaǵıdalary boıynsha tutynýshylarǵa nusqama júrgizý qajettigin eskertemiz», - dedi Mereke Pishembaev.