TJM mamandary elordanyń jeke turǵyn úıleriniń jylý berý maýsymyna daıyndyǵyn tekserýde
«15 tamyzdan bastap elimizde qysqy maýsym qarsańynda órt qaýipsizdigine arnalǵan aktsııa bastaldy. Bul aktsııanyń basty maqsaty - órt saldarynan bolatyn adamdardyń ólim-jitimine jol bermeý jáne órt sanyn azaıtý. Qazirgi tańda bul aktsııa jergilikti atqarýshy organdardyń jáne bilim basqarmalary ókilderimen, ishki ister, tótenshe jaǵdaılar organdary qyzmetkerlerimen birge jeke turǵyn úı sektorlary aýmaǵyn aralaý baǵytynda júrgizilip jatyr. Eń aldymen áleýmettik jaǵynan az qamtylǵan otbasylardyń úılerin aralaımyz. Jalpy respýblıka boıynsha 123 myńnan astam jeke turǵyn úı bar. Onyń ishinde 106 myńnan astam úıdi tekserip shyqtyq», - dedi QR TJM basqarma bastyǵy Oral Ábdirahmanov.
Onyń dereginshe, tekserilgen úılerde 71 myńnan astam órt qaýipsizdigi talabynyń buzylýy anyqtalǵan. 280 myńnan astam azamatqa órt qaýipsizdigi erejeleri túsindirilgen. Aıta ketetin jaıt, ótken jylý berý maýsymyna respýblıka aýmaǵynda 5001 órt tirkelgen. 222 adam qaza tapqan.
«Eń aldymen órt otty abaısyz paıdalanýdan shyǵady. Ekinshiden, jylytý peshterin qoldaný kezinde órt qaýipsizdigi erejelerin saqtamaýdan týyndap jatady. Sonymen qatar elektr jelilerin montajdaý kezinde órt qaýipsizdigin saqtamaý da órttiń shyǵýyna sebep bolady. Sondyqtan turǵyndarǵa jylytý maýsymy bastalǵan kezde jylý berý peshteriniń daıyndyǵyn tekserip, murjany kúıeden tazalaýǵa keńes beremiz. Buǵan qosa pesh jaǵýdy kishkentaı balalarǵa tapsyrmaý kerek», - dedi Oral Ábdirahmanov.