TJM qutqarýshylary joǵalǵan eki adamdy tapty
ASTANA. KAZINFORM – Búgin kúndiz Qaraǵandy oblysy Balqash qalasynan 140 shaqyrym jerde Saıaq kenti baǵytynda qutqarýshylar eki er adamdy izdestirý jumystaryn júrgizdi.
Olar keshe túnde Balqash qalasy baǵytynda sorǵy stantsııasynan avtokólikpen shyqqannan keıin baılanysqa shyqpaı qalǵan.
TJM izdestirý toby Aşyózek stantsııasyna deıin 20 shaqyrym jerde adasyp ketken adamdardy taýyp aldy. Belgili bolǵandaı olar qar qursaýynda qalyp qoıyp, qozǵalysty jalǵastyra almaǵan.
Avtokólik joldyń tazartylǵan ýchaskesine shyǵarylyp, Balqash qalasyna deıin jetkizildi.
Eske salsaq, Qaraǵandy oblysynyń qutqarýshylary qar qursaýynan 15 adamdy qutqarǵany týraly jazǵan edik. Sondaı-aq qutqarýshylar jeke kólikti qar qursaýynan shyǵarýǵa mindetti emestigi týraly jazǵan bolatynbyz.