Túrkistan oblysynda qutqarýshylar anasynyń aıtýy boıynsha sýǵa batqan balany izdestirip jatyr
ASTANA. KAZINFORM - Túrkistan oblysy Keles aýdanynda 2018 jyly týǵan balany izdeý boıynsha izdestirý-qutqarý jumystary júrip jatyr. Anasynyń aıtýynsha, ol 23 naýryz kúni saǵat 17: 00-de Keles ózeninde sýǵa qulap, batyp ketken, dep habarlaıdy QR Tótenshe jaǵdaılar mınıstrliginiń baspasóz qyzmeti.
Baspasóz málimetterine qaraǵanda, izdeý júrgizý úshin TJM, polıtsııa, UQK, jergilikti atqarýshy organdardyń kúshteri men quraldary, sondaı-aq týystary men eriktileri jumyldyryldy.
17:30 jaǵdaı boıynsha oblystyń TJD jedel-qutqarý jasaǵynyń qutqarýshylary Abaı jáne Júzimdik aýyldarynyń aımaǵyndaǵy uzyndyǵy 42 shaqyrym Keles ózeniniń arnasyn arnaıy ilmekter men arqandardy paıdalana otyryp tekserilip jatyr.
Eriktilermen birge Júzimdik, Qyzylásker jáne Ǵ. Muratbaev aýyldarynyń sý jaǵalýlary tekserý jumystary júrgizildi. Qazirgi ýaqytta Tótenshe jaǵdaılar mınıstrliginiń súńgýirlerin tarta otyryp, ózen beti boıynsha 15 shaqyrym jáne sý astynda 900 metr tekserildi.
-Budan basqa, Shymkent qalasy TJD jedel-qutqarý jasaǵy júzý quraldaryn paıdalana otyryp, uzyndyǵy 9 shaqyrym bolatyn Lesbekbatyr eldi mekeninen Syrdarııa ózenine deıingi ýchaskede izdestirý jumystaryn júrgizip jatyr. TJM 5 ushqyshsyz ushý apparatyn qoldaný arqyly Keles ózeni men Syrdarııa jaǵalaýy boıyndaǵy uzyndyǵy shamamen 55 shaqyrym aýmaqty tekserý ústinde. Іzdestirý jumystaryn júrgizý úshin eholot jabdyǵy men 8 júzý quraly tartyldy,-delingen habarlamada.
Sonymen qatar, izdeýdiń tıimdiligin arttyrý úshin 28 naýryzda Qazyǵurt aýdanyndaǵy shlıýzdiń jumysy toqtatyldy, 29 naýryzda Ózbekstan Respýblıkasynyń «Zah» kanalynyń shlıýzi jabyldy, bul da sý deńgeıin tómendetýge yqpal etedi. Іzdestirý-qutqarý jumystary jalǵasýda jáne baqylaýda. Barlyq tartylǵan qyzmetter qajetti sharalardy qabyldaıdy.
Osyǵan deıin 5 kún boıy aıdalada qar jep kúneltken malshynyń qutqarylǵany týraly jazdyq.
