TJM qutqarýshylary seısmıkalyq qaýipter boıynsha halyqaralyq jattyǵýǵa attandy
ASTANA. KAZINFORM — Qazaqstannyń TJM qutqarýshylary Tájikstan Respýblıkasynda ótetin jer silkinisteriniń saldary men klımattyq táýekelderge den qoıý boıynsha halyqaralyq kópjaqty oqý-jattyǵýǵa qatysady. Bul týraly vedomstvonyń baspasóz qyzmeti málim etti.
Vedomstvo delegatsııasynyń quramynda «Barys» respýblıkalyq qutqarý qyzmetiniń, Almaty qalasy TJD Qutqarý qyzmetiniń, Qaraǵandy oblysy men Shymkent qalasy TJD, sondaı-aq TJM Apattar medıtsınasy ortalyǵynyń qyzmetkerleri bar.
— Halyqaralyq oqý-jattyǵýdyń negizgi maqsaty vedomstvoaralyq jáne transshekaralyq ózara is-qımyl tetikterin jetildirý, avarııalyq-qutqarý bólimsheleriniń jedel ázirlik deńgeıin arttyrý, sondaı-aq seısmıkalyq belsendilik pen kúsheıip kele jatqan klımattyq táýekelderden týyndaǵan tabıǵı sıpattaǵy tótenshe jaǵdaılar kezinde kúshter men quraldardy qoldaný tıimdiligin tájirıbe júzinde tekserý, — delingen habarlamada.
Qoıylǵan mindetterdi oryndaý úshin qutqarýshylar ótimdiligi joǵary zamanaýı tehnıkany, avarııalyq-qutqarý jabdyqtaryn, gıdravlıkalyq avarııalyq-qutqarý quraldaryn, radıatsııalyq, hımııalyq jáne bıologııalyq qorǵaý quraldaryn, sondaı-aq arnaıy alpınıstik jáne súńgýirlik jabdyqtardy qoldanady.
— Qazaqstandyq qutqarýshylardyń halyqaralyq oqý-jattyǵýǵa qatysýy tótenshe jaǵdaılarǵa den qoıýdyń óńirlik júıesin nyǵaıtýdyń mańyzdy tetigine aınalyp, Ortalyq Azııa memleketteriniń beıindi qyzmetteri arasyndaǵy úılestirý deńgeıin arttyrýǵa, sondaı-aq joıqyn jer silkinisteri men transshekaralyq sıpattaǵy ózge de tabıǵı qaýipterdiń saldaryn joıýǵa den qoıýdyń praktıkalyq tetikterin jetildirýge múmkindik beredi, — dep habarlady mınıstrlikten.
Halyqaralyq oqý-jattyǵý «Sý jáne klımattyq táýekelder: ǵylym, monıtorıng jáne basqarý» óńirlik forýmy aıasynda uıymdastyrylyp, aýqymdy joıqyn jer silkinisiniń saldaryn joıý kezinde memleketaralyq den qoıý algorıtmderin keshendi túrde pysyqtaýǵa baǵyttalǵan.
Aıta keteıik, TJM Kaspııdegi teńiz qutqarý júıesin nyǵaıtyp jatyr.
