TJM qutqarýshylary Qarqaraly taýlarynda adasqan týrısterdi tapty
ASTANA. KAZINFORM – Qaraǵandy oblysy Qarqaraly aýdanynda «Shahter» demalys aımaǵynyń mańyndaǵy taýǵa serýendeýge shyqqan bes týrısti, onyń ishinde úsh balany izdestirý-qutqarý jumystary júrgizildi, dep habarlaıdy QR Tótenshe jaǵdaılar mınıstrliginiń baspasóz qyzmeti.
Týrıster «Shahter» demalys aımaǵynan soltústikke qaraı 15 shaqyrym jerde ornalasqan Qarqaraly memlekettik ulttyq tabıǵı parkiniń aýmaǵyndaǵy «Kendara» shatqalynda bolǵan.
TJM qutqarýshylary oqıǵa ornyna jedel jetip, berilgen baǵyt pen baılanys aqparatynyń arqasynda demalýshylardy jyldam taýyp, olardy aman-esen «Shahter» demalys aımaǵyna jetkizdi. Olarǵa medıtsınalyq kómek qajet bolǵan joq.
TJM ormanǵa bararda qýaty tolyq telefondy, aýyz sý men azyq-túlik qoryn mindetti túrde alyp júrý qajettigin eske salady.
- Jaqyndaryńyzǵa baratyn baǵytyńyz týraly aldyn ala habarlap, qarańǵy ýaqytta ormanǵa shyqpaǵan jón, - delingen habarlamada.
Osyǵan deıin Almaty mańyndaǵy taýda adasyp ketken eki jasóspirimniń qutqarylǵany týraly jazdyq.
