TJM qutqarýshylary Esil ózeninde patrýldeý jumystaryn júrgizdi
ASTANA. KAZINFORM – Astana qalasyndaǵy Esil ózeniniń jaǵasynda «Elimizdiń óńirlerindegi sý aıdyndarynda profılaktıkalyq is-sharalar jalǵassg jatyr» taqyrybynda kóshpeli brıfıng ótti. Іs-shara aıasynda TJM qutqarýshylarynyń qatysýymen Esil ózeni boıynda patrýldeý júrgizildi.
Kóktemgi kezeńde sý aıdyndaryndaǵy muz erekshe qaýipti bolady. Ol syrttaı berik kóringenimen, óziniń beriktigin joǵaltady. Jyl saıyn dál osy ýaqytta jazataıym oqıǵalar sany artady. Qazirgi ýaqytta ońtústik óńirlerde sý aıdyndaryndaǵy muz erip ketken, al basqa óńirlerde muz bosap, muz júrýi baıqalady.
Qysqy kezeń bastalǵaly beri (2025 jylǵy qarashadan) qutqarýshylar sý aıdyndarynda 30 myńnan astam reıd pen patrýldeý jumystaryn júrgizdi. TJM qyzmetkerleri profılaktıkalyq jumystar júrgizip, 105 myńnan astam azamatpen túsindirý áńgimelerin ótkizdi, 50 myń balyqshyǵa nusqama berildi. Profılaktıkalyq is-sharalar barysynda qutqarýshylar azamattarǵa muzǵa shyǵýdyń qaýiptiligi týraly eskertip, qaýipsizdik erejeleri jóninde túsindirý jumystaryn júrgizip jatyr.
Zamanaýı tehnıkamen jaraqtandyrý jáne qutqarýshylardyń úılesimdi jumysynyń arqasynda qysqy kezeń bastalǵaly beri 40 adam, onyń ishinde 15 bala qutqaryldy. Bul halyqtyń qaýipsizdigin qamtamasyz etý boıynsha qabyldanyp jatqan sharalardyń tıimdiligin kórsetedi.
TJM jedel-qutqarý bólimsheleri materıaldyq-tehnıkalyq bazany nyǵaıtýdy jalǵastyryp jatyr. Zamanaýı aeroqaıyqtar, katerler, qarda júretin kólikter, kvadrotsıklder jáne arnaıy avarııalyq-qutqarý tehnıkalary sý aıdyndaryndaǵy qaýipsizdikti qamtamasyz etý úshin belsendi qoldanylyp jatyr.
Jańa tehnıkany qoldaný qutqarýshylarǵa sý aıdyndaryn jyldam tekserýge, juqa muz basqan qaýipti ýchaskelerdi anyqtaýǵa jáne tótenshe jaǵdaılarǵa ýaqytyly áreket etýge múmkindik beredi. Ótimdiligi joǵary jáne mobıldi tehnıka jetýi qıyn jerlerge jetýge múmkindik berip, qutqarý operatsııalarynyń tıimdiligin arttyrady.
Eske salamyz: muz qatý jáne muz erý kezeńinde muzǵa shyǵýǵa qatań tyıym salynady.
TJM qaýipsizdik erejelerin qatań saqtaýǵa shaqyrady:
▪️ juqa jáne berik emes muzǵa shyqpańyz
▪️ bir jerde toppen jınalmańyz
▪️ jaryqshaqtarǵa, oıyqtarǵa jaqyndamańyz
▪️ resmı ótkelderden tys jerlerde muzǵa avtokólikpen shyqpańyz
Qarapaıym qaýipsizdik erejelerin saqtaý qaıǵyly jaǵdaılardyń aldyn alýǵa kómektesedi.
Aıta keteıik, ShQO-da sý tasqynyna qarsy áýeden baqylaý júrgizildi.