TJM qutqarýshylary Almaty taýynda jaralanǵan týrıstke kómek kórsetti

ALMATY. KAZINFORM – Almatydaǵy Tıtov kóliniń kempıng-aımaǵynda týrısterdiń biri medıtsınalyq kómekke muqtaj bolǵany týraly habarlama Tótenshe jaǵdaılar mınıstrliginiń qutqarýshylaryna tústi.

TJM málimetinshe, oqıǵa teńiz deńgeıinen 3360 metr bıiktikte bolǵan. Respýblıkalyq jedel-qutqarý jasaǵynyń toby Medeý beketinen qajetti quraldarmen jolǵa shyqty. Qutqarýshylarǵa «Qazavıaqutqarý» AQ-nyń Mı-8 tikushaǵy jumyldyryldy.

«Qutqarýshylar naýqasty evakýatsııalap, Boraldaı áýejaıyna jetkizdi. Zardap shekken adam TJM Medıtsınalyq apattar ortalyǵynyń dárigerlerine tapsyryldy. Qasyndaǵy eki týrıst evakýatsııadan bas tartty», – delingen habarlamada.

Vedomstvo evakýatsııa barlyq qyzmetterdiń úılesimdi áreketiniń arqasynda sátti jáne ýaqytyly aıaqtalǵanyn atap ótti.

Aıta keteıik, Kúıgensaı shatqalynda týrısterge arnalǵan jańa jaıaý júrginshiler kópiri ashylady.