Sergeı Zınovev kınologııa salasyna 30 jyldan astam ýaqytyn arnaǵan

QR Tótenshe jaǵdaılar mınıstrligi baspasóz qyzmetiniń habarlaýynsha, búginde ol jedel-qutqarý jasaǵynyń kınologııalyq bólimshesin basqaryp, qutqarý ıtterin daıarlaý jáne jas mamandardyń kásibı sheberligin arttyrý baǵytynda eńbek etip keledi.

Sergeıdiń kásibı joly kınologııadaǵy kópjyldyq qyzmetpen baılanysty. Ol shırek ǵasyrǵa jýyq ýaqyt polıtsııa salasynda qyzmet atqarǵan. Osy kezeńde jınaqtaǵan bilimi men tájirıbesi keıingi qutqarý qyzmetindegi jumysyna negiz boldy. Búginde ol kásibı tájirıbesin izdestirý-qutqarý jumystaryna qatysatyn kınologııalyq eseptoptardy daıarlaýǵa jáne jas mamandarǵa úıretýge baǵyttap keledi.

Kınologtyń jumysy turaqty daıyndyqty, shydamdylyqty jáne joǵary jaýapkershilikti talap etedi. Úıindiler astynan, taýly aımaqtar men orman alqaptarynan adam izdeý qutqarýshy men ıttiń úılesimdi jumys isteýin qajet etedi. Ittiń ótkir ıis sezý qabileti adamnyń kózge kórinbeıtin nemese tehnıkalyq quraldarmen anyqtaý qıyn jaǵdaılarda izdestirý jumystaryn júrgizýge múmkindik beredi. Mundaı sátterde kınologtyń kásibıligi, jaǵdaıdy durys baǵalaýy jáne ıtpen úılesimdi jumys isteı bilýi erekshe mańyzǵa ıe.

Sergeıdiń janynda izdestirý-qutqarý jumystaryna daıyndalyp júrgen nemis ovcharkasy Dınka bar. Ol Mıhaılov sý qoımasy mańynda 13 jastaǵy balany izdestirý jumystaryna, sondaı-aq Saıram aýdanynyń Shaprashty aýylynda joǵalǵan er adamdy izdeýge qatysqan. Mundaı izdestirý jumystary ıttiń izdeý daǵdylaryn jetildirip, kúrdeli jaǵdaılarda áreket etý qabiletin damytýǵa múmkindik beredi.

-Jaqynda kınologııalyq eseptoptar arasynda ótken respýblıkalyq sertıfıkattaý synaqtarynda Dınka joǵary nátıje kórsetip, synaqtardan sátti ótti. Ol qazaq jáne orys tilderindegi komandalardy túsinedi. Bul jetistiktiń artynda júıeli jattyǵýlar, úzdiksiz daıyndyq jáne kınologtyń kúndelikti eńbegi jatyr. Itti izdestirý-qutqarý jumystaryna daıyndaý - ýaqytty, shydamdylyqty jáne kásibı sheberlikti talap etetin kúrdeli úderis,-dep jazady QR TJM baspasóz qyzmeti.

Sergeı Zınovev - halyqaralyq deńgeıdegi maman, halyqaralyq qutqarý komandasynyń quramyna kiredi. Ol óziniń kásibı biliktiligin únemi jetildirip qana qoımaı, jınaqtaǵan tájirıbesin jas kınologtarǵa úıretedi. Kınologııadan bólek, Sergeı súńgýir jáne alpınıst retinde de qyzmet atqarady. Bul baǵyttar fızıkalyq tózimdilikti, tehnıkalyq daıarlyqty, tártipti jáne kúrdeli jaǵdaılarda durys sheshim qabyldaı bilýdi talap etedi.

Qutqarýshy-kınologtyń qyzmeti tek izdestirý jumystaryna qatysýmen shektelmeıdi. Onyń mańyzdy bóligi kúndelikti jattyǵý, ıttiń izdeý daǵdylaryn jetildirý, ony túrli jaǵdaılarǵa daıyndaý jáne kez kelgen ýaqytta tapsyrmany oryndaýǵa ázir bolý. Kınolog ıttiń minez-qulqyn jaqsy túsinip, onyń áreketindegi ózgeristerdi baıqap, izdestirý barysynda durys baǵyt bere bilýi qajet. Osyndaı daıyndyq pen ózara senim izdestirý-qutqarý jumystarynyń nátıjeli bolýyna yqpal etedi.

Sergeı Zınovev úshin kınologııa - jaı ǵana ıt úıretý emes. Bul kásibı bilimdi, shydamdylyqty, jaýapkershilikti jáne óz isine adaldyqty talap etetin mańyzdy qyzmet. Onyń kópjyldyq tájirıbesi men kúndelikti eńbegi adamdardyń ómirin saqtaýǵa baǵyttalǵan qutqarý isiniń ajyramas bóligi.

Osyǵan deıin «Qazavıaqutqarý» AQ Jedel basqarý ortalyǵynyń jedel kezekshisi Alma Muhamedıeva týraly jazdyq.