TJM qutqarý isine jasandy ıntellektini engizip jatyr
ASTANA. KAZINFORM – Tótenshe jaǵdaılar mınıstrligi óz jumysynda qandaı tsıfrlyq tehnologııalar men jasandy ıntellektini qoldana bastaǵanyn málimdedi.
Tótenshe jaǵdaılar vıtse-mınıstri Kegen Tursynbaevtyń aıtýynsha, tsıfrlyq tehnologııalar búginde qaýip-qaterdiń aldyn alýda jáne tótenshe jaǵdaılardyń saldaryn joıýda basty quralǵa aınalyp otyr.
- Geoaqparattyq jáne spýtnıktik júıeler belsendi engizilip jatyr. Tabıǵı qaýipterdi taldaýǵa jasandy ıntellektini paıdalanyp, qaýipti aımaqtardyń tsıfrlyq kartalaryn ázirlep jatyrmyz, - dedi ol Ortalyq kommýnıkatsııalar qyzmetindegi baspasóz máslıhatynda.
Sonymen qatar spıker eskertý júıesiniń tsıfrlyq transformatsııasy aıaqtalyp, eski qurylǵylardyń ornyna zamanaýı platformalar engizilgenin atap ótti.
- Almatyda yqtımal jer silkinisi jáne basqa da tótenshe jaǵdaılar týraly halyqty eskertetin «MASS ALERT» shuǵyl habarlaý júıesi jumys isteıdi. Bul joba barlyq seısmıkalyq qaýipti aımaqtarǵa taratylmaq, - dedi Tursynbaev.
Vıtse-mınıstr tsıfrlandyrý nátıjesinde tótenshe jaǵdaılardyń aldyn alý tıimdiligi edáýir artqanyn aıtady. Máselen, sońǵy jyly sý basqan eldi mekender sany 95 paıyzǵa azaıǵan.
— Tsıfrlyq jańǵyrtý jumystary munymen shektelmeıdi. Qazir mınıstrlik tabıǵı jáne tehnogendik qaýipterge jasandy ıntellekt arqyly boljam jasaý, drondarmen monıtorıng júrgizý jáne onlaın karta negizinde táýekelderdi taldaý júıesin damytý ústinde. Bizdiń maqsatymyz - tótenshe jaǵdaı týyndamaı turyp, ony boljaý jáne halyqty der kezinde eskertý. Tsıfrlyq tehnologııalar - qutqarý isiniń jańa betburysy, - dedi Kegen Tursynbaev.
Aıta keteıik, TJM qyzmetkerlerine kóterme jáne qosymsha tólemder qalaı tólenetinin jazǵan edik.
Kamıla Múlik
