TJM «KTK» arnasyn aqparatty ádeıi burmalady dep aıyptap, ony joqqa shyǵarýdy talap etýde
ASTANA. QazAqparat - QR Tótenshe jaǵdaılar mınıstrligi Ortalyq kommýnıkatsııalar qyzmetinde ótken mınıstr V.Bojkonyń brıfıngine baılanysty «KTK» arnasy aqparatty ádeıi burmalady dep aıyptap, ony joqqa shyǵarýdy talap etýde.
Bul týraly atalmysh mınıstrliktiń baspasóz qyzmetinen habarlandy.
«KTK» telearnasy taratqan aqparatqa baılanysty mynany habarlaımyz: mınıstrdiń sóılegen sózinde, sondaı-aq onyń suraqtarǵa bergen jaýaptarynda «spasenıe ýtopaıýşıh - delo rýk samıh ýtopaıýşıh» degen sóz aıtylǵan joq. Oǵan atalmysh brıfıngtiń tolyq jazbasyn qarap, kóz jetkizýge bolady. Sonymen qatar 2014 jylǵy 17 shildede bolǵan «KTK» arnasyndaǵy keshki jańalyqtarda «sýdaǵy qaýipsizdik qaǵıdasyn Úkimette jazdyń sońyna deıin qabyldaýǵa ýáde berýde, ol kezde jaǵajaı maýsymy aıaqtalady da» dep aıtyldy. Alaıda, Tótenshe jaǵdaılar mınıstri suraqtarǵa jaýap bere otyryp naqty atalmysh qaǵıda qabyldanatyn kún - aǵymdaǵy jylǵy 22 shildede - Úkimettiń kelesi otyrysynda dep aıtqan bolatyn», - delingen vedomstvo taratqan baspasóz habarynda.
Sondaı-aq mınıstrlik «KTK» saıtynda sý aıdyndarynda balalardyń qaza bolýy faktilerine baılanysty TJM-nyń áreketsizdigine is júzinde kiná taǵa otyryp, jarııa etilgen aqparattyń taqyrybyn ersi kóredi.
«Tótenshe jaǵdaılar mınıstrligi jumysy týraly aqparatty turaqty túrde ádeıi burmalaý narazylyq týdyrady, biz ony qorqytý jáne mınıstrlik basshylyǵyna yqpal etý dep baǵalaımyz. Mınıstrlik sybaılas jemqorlyqpen kúresti belsendi túrde áli de júrgizýde jáne para alyp, qutqarýshy degen joǵary ataqqa laıyq emes adamdar jumystan bosatylatynyn aıtady. Osyǵan baılanysty QR Tótenshe jaǵdaılar mınıstrligi aıtylǵan aqparatty teriske shyǵarýdy talap etedi, sondaı-aq «Buqaralyq aqparat quraldary týraly» Qazaqstan Respýblıkasy Zańyna sáıkes «Azamattardyń nemese uıymdardyń (memlekettik organnyń, azamattardyń qoǵamdyq, shyǵarmashylyq, ǵylymı, dinı ne ózge de birlestiginiń jáne zańdy tulǵalardyń) ar-namysy men qadir-qasıetine nuqsan keltiretin, shyndyqqa sáıkes kelmeıtin málimetterdi taratý, buqaralyq aqparat quraldary arqyly sotqa yqpal jasaý Qazaqstan Respýblıkasynyń zań aktilerinde kózdelgen jaýaptylyqqa ákep soǵatynyn» eskertedi», - delingen baspasóz baıanynda.
