TJM qyzmetkerleri Semeıdegi jańa kópirden sekirmek bolǵan er adamdy qutqardy

SEMEI. KAZINFORM – Abaı oblysy TJD-nyń 112 pýltine Semeı qalasyndaǵy jańa kópirdiń pılonyna er adamnyń kóterilgeni týraly habar tústi. Bul týraly Kazinform agenttigi QR Tótenshe jaǵdaılar mınıstrligine silteme jasap habarlaıdy.

Oqıǵa ornyna jedel túrde TJM, polıtsııa, jedel medıtsınalyq járdem jáne jergilikti atqarýshy organdardyń kúshteri men quraldary jiberildi. Er adammen baılanys ornatý úshin pılonǵa TJM-niń psıhology men qutqarýshysy kóterildi. 

Sonymen qatar qutqarýshylar Ertis ózeninde qaýipsizdikti qamtamasyz etý maqsatynda qutqarý qaıyqtaryn ornalastyryp, jaǵdaıdy áýeden baqylaý jáne baǵalaý úshin ushqyshsyz ushý apparatyn (drondy) qoldandy. 

Er adammen kelissózderdi Operatıvti-qutqarý jasaǵynyń bólimshe bastyǵy, qutqarýshy Rınat Babadjanov júrgizdi. Onyń kásibı biliktiligi men barlyq qyzmet túriniń jedel áreketiniń arqasynda er adam pılonnan túsirildi. 

Eske sala keteıik, buǵan deıin Rıdderde polıtseı qyzmetkeri mototsıkl júrgizýshisin qýamyn dep qaǵyp ketkenin jazǵan edik.