TJM keńesi: Jańa jyldy qalaı qaýipsiz qarsy alýǵa bolady

ASTANA. KAZINFORM – Jańa jyldyq is-sharalarǵa daıyndyq qyzý júrip jatyr. Elimizdiń barlyq turǵyndary merekeni qarsy alýǵa daıyndalýda.

Mereke tótenshe oqıǵasyz ótýi úshin TJM jańa jyldyq is-sharalardy daıyndaý jáne merekeleý kezinde órt qaýipsizdigi sharalaryn qatań saqtaýdy eske salady.

Aýqymdy merekelik is-sharalar ótkiziletin úı-jaılarda terezelerde torlar bolmaýy tıis, evakýatsııalyq joldar bos bolýy kerek.

- Shyrshany berik tirekke ornatý kerek, ol bólmeden shyǵýǵa kedergi keltirmeýi tıis. Shyrshany janǵysh oıynshyqtarmen bezendirmeńizder.

Úı-jaıda otshashýlardy, petardalardy jáne basqa da órt qaýipti áserlerdi paıdalanýǵa qatań jol berilmeıdi.

Pırotehnıkany ǵımarattardan, avtoturaqtardan 50 metrden jaqyn, elektr berý jelileriniń, shatyrlar men aǵashtardyń astynda iske qosýǵa jol berilmeıdi. Kámeletke tolmaǵandarǵa pırotehnıkany óz betinshe paıdalanýyna tyıym salynady. Sondaı-aq salıýtterdi qoldan, balkondar men lodjııalardan ushyrý qaýipti, - delingen habarlamada.

Sonymen qatar pırotehnıkalyq buıymdardy mamandandyrylǵan pavılondarda satyp alý qajet ekendigine nazar aýdaramyz. Pırotehnıkany, jaryqtandyrýdy, elektr gırlıandalaryn jáne áshekeılerdi tıisti sertıfıkattyń bar ekenine kóz jetkizip satyp alyńyz.

Mereke kúnderi oqıǵasyz ótýi úshin órt qaýipsizdigi erejelerin saqtańyzdar:

- belgisiz óndiristiń elektr gırlıandalary men pırotehnıkasyn satyp almańyzdar;

- qoldanar aldynda nusqaýlyqpen tanysyp, ony qatań saqtańyzdar;

- pırotehnıkany qatty jelde iske qosýǵa bolmaıdy;

- bir ýaqytta birneshe joǵary qýatty qurylǵylardy qosý arqyly elektr jelisin shamadan tys júktemeńizder;

- eger siz úıden ketseńiz nemese uıyqtaýǵa jatsańyz, gırlıandtardy toqqa qosýly qaldyrmańyzdar;

- balalarǵa pırotehnıkalyq buıymdardy óz betinshe iske qosýǵa ruqsat bermeńizder;

- balalardy qaraýsyz qaldyrmańyzdar.

Aıta keteıik, buǵan deıin TJM qutqarýshylary qar qursaýynan 2 adamdy qutqarǵanyn jazǵanbyz.