TJM Kaspııdegi teńiz qutqarý júıesin nyǵaıtyp jatyr
ASTANA. KAZINFORM — Qazaqstan Respýblıkasynyń Tótenshe jaǵdaılar mınıstri general-leıtenant Shyńǵys Árinov jumys sapary barysynda Atyraý oblysyndaǵy Soltústik Kaspıı ekologııalyq den qoıý bazasyna bardy. Bul týraly vedomstvonyń baspasóz qyzmeti málim etti.
Vedomstvo basshysyna Kaspıı teńiziniń qazaqstandyq sektorynda munaıdyń avarııalyq tógilýin joıýǵa, avarııalyq-qutqarý jáne izdestirý-qutqarý operatsııalaryn júrgizýge arnalǵan mamandandyrylǵan kemeler, tehnıka men jabdyqtar tanystyryldy. Sonymen qatar teńiz flotynyń akvatorııaǵa jedel shyǵýǵa daıyndyǵyna jáne óńirdiń beıindi ınfraqurylymynyń jaǵdaıyna erekshe nazar aýdaryldy.
— Buǵan deıin Qazaqstan Respýblıkasy Prezıdentiniń tapsyrmasymen Kaspııdegi ekologııalyq qaýipsizdik júıesin kúsheıtý jáne ulttyq teńiz avarııalyq-qutqarý ınfraqurylymyn damytý mindeti qoıylǵan bolatyn. Osy tapsyrmalardy oryndaý aıasynda teńizdegi tótenshe jaǵdaılarǵa den qoıýdy, avarııalyq-qutqarý jáne izdestirý-qutqarý jumystaryn júrgizýdi, munaıdyń avarııalyq tógilýin joıýdy jáne Kaspıı teńizi akvatorııasyn ekologııalyq qaýipterden qorǵaýdy qamtamasyz etetin «Teńiz jasaǵy» AQ quryldy, — dep habarlady vedomstvodan.
Sapar barysynda «Prımorskıı» kanaly men den qoıý bazasyna baratyn sý joldarynyń keme qatynasyna jaramdylyǵyn qamtamasyz etý máseleleri qaraldy. Kaspıı teńizi deńgeıiniń tómendeýi jaǵdaıynda bul sharalar mamandandyrylǵan kemelerdiń turaqty jumysy men táýlik boıy tótenshe jaǵdaılarǵa jedel den qoıý úshin erekshe mańyzǵa ıe boldy. Mınıstrdiń tapsyrmasy boıynsha Qazaqstan TJM úılestirýimen 2026 jylǵy naýryz aıynan bastap kanaldy keńeıtý, tereńdetý, melıoratsııalaý jáne abattandyrý boıynsha aýqymdy jumystar júrgizildi.
— Barlyq is-sharalar bıýdjet qarajatyn tartýsyz oryndaldy. Júrgizilgen jumystar kanaldyń tolyq tazartylýyna jáne mamandandyrylǵan flotty odan ári paıdalaný úshin sý marshrýtynyń tolyqqandy jumysyn qalpyna keltirýge múmkindik berdi, — delingen habarlamada.
Іs-sharaǵa Atyraý oblysy ákiminiń orynbasary Qaırat Nurtaev pen NCOC kompanııasy basqarýshy dırektorynyń orynbasary Jandos Orazalıev qatysty. Qaırat Nurtaev kanaldyń tazartylýyn óńir úshin tarıhı oqıǵa ári teńiz ınfraqurylymynyń turaqty jumysyn qamtamasyz etýdegi mańyzdy qadam dep atady.
Soltústik Kaspıı jobasynyń basshylyǵy ekologııalyq jáne ónerkásiptik qaýipsizdik salasyndaǵy tıimdi yntymaqtastyq úshin Tótenshe jaǵdaılar mınıstrligine alǵys bildirdi. Sapar qorytyndysy boıynsha TJM basshysy Kaspıı óńirindegi teńiz avarııalyq-qutqarý ınfraqurylymyn damytý jáne den qoıý áleýetin kúsheıtý vedomstvo jumysynyń basym baǵyttarynyń biri bolyp qala beretinin atap ótti.
Aıta keteıik, TJM terek mamyǵy órt qaýpin kúsheıtetinin eskertti.
