TJM ınnovatsııalyq órt sóndirýshi robotty tanystyrdy
ASTANA. KAZINFORM - Qazaqstanda respýblıkalyq referendým ótkizý aıasynda «QAZAQSTAN» telearnasynyń efırinde «Referendým-2026» aýqymdy onlaın-marafony uıymdastyryldy, dep habarlaıdy QR Tótenshe jaǵdaılar mınıstrliginiń baspasóz qyzmeti.
Marafonda kórermender órt sóndirýshi robotpen tanysty.
Shynjyr tabany bar robot qashyqtan basqarylady. Ol Petropavl qalasyndaǵy zaýyt mamandary men Soltústik Qazaqstan oblysy Tótenshe jaǵdaılar departamentiniń birlesken eńbeginiń nátıjesi. Bul joǵary tehnologııalyq apparat órtti kúrdeli, basqasha aıtqanda qutqarýshylardyń ómirine qaýip tóndirýi múmkin óndiristik nysandardaǵy órtti sóndirýge arnalǵan.
Telemarafon barysynda Soltústik Qazaqstan oblysy TJD Órt sóndirý jáne avarııalyq-qutqarý jumystaryn uıymdastyrý basqarmasy jedel kezekshisiniń orynbasary azamattyq qorǵaý kapıtany Janat Qaparov robottandyrylǵan qondyrǵynyń biregeıligi men onyń tótenshe jaǵdaılar salasyndaǵy qaýipsizdikti arttyrýdaǵy róli týraly egjeı-tegjeıli aıtyp berdi.
Ol bul robottyń qutqarýshylardyń ómirine tónetin qaýip-qaterden saqtandyrýǵa arnalǵanyn atap ótti. Bul ásirese iri ári qaýipti órtterdi joıý kezinde asa mańyzdy.
Qaparovtyń aıtýynsha, mundaı robottardy qoldaný qutqarý operatsııalarynyń tıimdiligin arttyryp, ýaqyt pen resýrstar shyǵynyn azaıtýǵa, sondaı-aq adam shyǵyny qaýpin tómendetýge múmkindik beredi.
-Bul ınnovatsııalyq ázirleme Qazaqstannyń tehnologııalyq jetistikteri salasyndaǵy mańyzdy qadam bolyp tabylady jáne qutqarýshylar men azamattardyń qaýipsizdigin arttyrýǵa degen umtylysty bildiredi,-delingen habarlamada.
Osyǵan deıin Petropavlda óndiristik tsehtan shyqqan órttiń robottyń kómegimen sóndirilgeni týraly jazdyq.