TJM-ge jańa 11 áýe kemesi satyp alynady
ASTANA. KAZINFORM – Azamattyq qorǵaý salasyndaǵy birinshi kezektegi sharalardyń 2023-2027 jyldarǵa arnalǵan keshendi josparyna túzetýler engizildi. Tıisti qaýlyǵa QR Premer-Mınıstri Oljas Bektenov qol qoıdy.
Bıylǵy qańtar aıynda seısmıkalyq qaýipsizdik máseleleri jónindegi keńeste Memleket basshysy Qasym-Jomart Toqaev tótenshe jaǵdaılardyń aldyn alý jáne joıý júıesiniń materıaldy-tehnıkalyq bazasyn nyǵaıtý sharalaryn qabyldaýdy tapsyrǵan bolatyn.
Prezıdent tapsyrmalaryn iske asyrý sheńberinde Azamattyq qorǵaý salasyndaǵy birinshi kezektegi sharalardyń 2023-2027 jyldarǵa arnalǵan keshendi josparyna zamanaýı avıatsııalyq tehnıka satyp alýǵa qatysty túzetýler engizildi.
Qarjy lızıngi tetigin paıdalaný arqyly TJM materıaldy-tehnıkalyq bazasyn jabdyqtaý úshin 11 áýe kemesin satyp alý josparlanyp otyr.
24,8 mlrd teńge mólsherindegi qajetti soma respýblıkalyq bıýdjetten 2027 jylǵa deıin kezeń-kezeńimen bólinetin bolady. Máseleni Respýblıkalyq bıýdjet komıssııasy tujyrymdamalyq túrde qoldady.
TJM materıaldyq-tehnıkalyq bazasyn nyǵaıtý avıatsııalyq tehnıkamen qamtý aımaqtaryn keńeıtýge múmkindik beredi. Áýe kemeleri jetý qıyn jerlerde oryn alǵan tótenshe jaǵdaılar aımaqtarynan evakýatsııalaý jáne qutqarý bólimsheleriniń jedel áreket etýin qamtamasyz etý úshin, sondaı-aq sý tasqyny jáne órt qaýpi basym kezeńderde monıtorıngtiń tıimdiligin arttyrý maqsatynda qoldanylady.
