TJM-ge Qazaqstanda qurastyrylǵan tikushaq tabystaldy
Jańa jobalardy iske qosý men azamattyq óndiristi damytý aıasynda «Qazaqstan Injınırıng» ulttyq kompanııasyna qarasty «Evrokopter Qazaqstan ınjınırıng» zaýytynda H145 jáne H125 markili tikushaqtary jınaqtalyp, tapsyrys berýshilerge tabystaldy.
Airbus Helicopters H145-tiń alǵashqy danasy Tótenshe jaǵdaılar mınıstrligine berildi. Bul úlgidegi model Airbus-tyń qos motorly tikushaqtary tobyna jatady.
«Atalǵan áýe tehnıkasynyń sapasy álemdik óndirýshi kompanııalardyń qoldanystaǵy standarttaryna, sondaı-aq Eýropalyq avıatsııalyq qaýipsizdik agenttiginiń (EASA) ushý jaramdylyǵynyń normalaryna saı keledi. H145 áýege kóterilgende 5 qalaqty rotor terbelisti aıtarlyqtaı tómendetýge septigin tıgizdi. Bul joǵary terbelisti báseńdetý júıesin qajet etpeıtinin kórsetti. Nátıjesinde paıdaly júkteme 150 kelige deıin ulǵaıtyldy. Osy tikushaq óz sanatynda aýyr salmaqty áýe tehnıkasy sanalady. Mysaly, 2019 jyly H145 And taýynyń bıiktiktigi 6 961 metr bolatyn Akonkagýa shyńyna sátti qonyp, tehnıkalyq sıpattamasy oń jaǵynan baıqaldy», - dedi «Qazaqstan Injınırıng» UK» AQ basqarma tóraǵasy Temirjan Ábdirahmanov.
Qazir TJM-niń avıatsııalyq parki otandyq jáne sheteldik áýe quraldarymen, onyń ishinde H145, H130 syndy tikushaqtarmen tolyqtyrylǵan.
Budan basqa Dala Air áýe kompanııasyna H125 tikushaǵyn tabystaý rásimi ótkizildi. H125 – Airbus kompanııasynyń bir motorly tikushaǵy. Onyń naryqta satylyp kele jatqanyna 40 jyldan asyp, keıingi 30 jylda óz sanatynda kósh bastap keledi. Tehnıkalyq múmkindigi jaǵynan bul tikushaq ámbebaptyǵymen, qaýipsizdik deńgeıi, sondaı-aq qolaıly quny jáne shuǵyl jaǵdaılardaǵy utqyrlyǵymen óz básekelesterinen ozyq bolyp tur. FADEC tsıfrly basqarý júıesimen jaraqtalǵan qýatty qozǵaltqysh H125-ti 7 myń metr bıiktikke deıin kóterýge múmkindik beredi.
Joǵaryda atalǵan tikushaqtardy izdestirý-qutqarý jumystarynda, medıtsınalyq kómek kórsetý men sanıtarlyq is-sharalar júrgizýde, jabaıy ańdar men janýarlardy sanaýda, orman qoryna baqylaý jasap, qorǵaý sharalaryna paıdalaný josparlanyp otyr. Áýe quraly Qazaqstannyń klımattyq jáne geografııalyq jaǵdaılaryna qoldanýǵa tolyq jaramdy, sonymen birge bıik taýly jerler men ystyq klımatty ýaqyttarda ushýǵa beıimdelgen.
Elimizdiń avıatsııalyq bólimsheleri men tehnıkalyq quramy jańa tikushaqtardy tizgindep, olarǵa qyzmet kórsetýge baılanysty teorııalyq ári tájirıbelik daıarlaýdan ótken.
