TJM-ǵa tabıǵı órtke qarsy respýblıkalyq oqý-jattyǵý ótkizý tapsyryldy
ASTANA. KAZINFORM — QR Premer-mınıstri Oljas Bektenov Tótenshe jaǵdaılar mınıstrligine mamyr aıynyń sońyna deıin tabıǵı órtke qarsy respýblıkalyq komandalyq shtabtyq oqý-jattyǵý ótkizýdi tapsyrdy.
— Tótenshe jaǵdaılar mınıstrligi Ekologııa mınıstrligimen jáne basqa da múddeli memlekettik organdarmen birlesip, mamyr aıynyń sońyna deıin tabıǵı órtke qarsy respýblıkalyq komandalyq shtabtyq oqý-jattyǵýlaryn ótkizsin. Onda transshekaralyq órtti sóndirý jáne kórshi memleketterdiń qyzmetterimen ózara is-qımyl máselelerin pysyqtaý kerek, — dedi ol Úkimet otyrysynda.
Sondaı-aq Oljas Bektenov órttiń aldyn alý úshin avıatsııany paıdalaný máselesin kóterdi.
— Órt qaýpi joǵary óńirlerde memlekettik avıatsııanyń órt sóndirýge arnalǵan tikushaqtarynyń kezekshiligin uıymdastyrý máselesin qarańyzdar. Orman alqaptary men ashyq jerlerdi sholyp shyǵý úshin pılotsyz ushatyn apparattardy paıdalaný kerek, — dedi Úkimet basshysy.
Aıta ketelik Oljas Bektenov Pavlodar jáne Abaı oblysynda bolǵan tabıǵı órt kezinde memlekettik organdardyń is-qımyl algorıtmi saqtalmaǵanyn synǵa alǵan edi.