TJM erikti órt sóndirý pýnkteriniń sanyn 700-ge jetkizýdi josparlap otyr
ASTANA. KAZINFORM – Bul týraly Tótenshe jaǵdaılar mınıstri general-leıtenant Shyńǵys Árinov 2026 jylǵy órt qaýipti maýsymǵa daıyndyq týraly tótenshe jaǵdaılardy joıý jónindegi respýblıkalyq jedel shtabtyń kóshpeli otyrysynda aıtty.
Mınıstrdiń aıtýynsha, qazirgi tańda ár óńirde sý tógý qurylǵylarymen jabdyqtalǵan áýe kemeleri bar avıajasaqtar quryldy. Joǵary qaýipti orman aımaqtarynda jerústi jáne áýe patrýldeý jedel toptary táýlik boıy kezekshilik atqarady.
- Aýyldyq jerlerde «Aýyl qutqarýshylary» uıymdary nyǵaıtylyp jatyr. Elimizde qazirdiń ózinde 167 erikti órt sóndirý pýnkti quryldy, bıyl olardyń sanyn 700-ge deıin ulǵaıtý josparlanyp otyr. Búgingi kúni osy pýnktter shamamen 900 órtti sóndirdi, – dedi mınıstr.
Sondaı-aq onyń aıtýynsha, tabıǵı órtterge jedel áreket etetin kúshter men quraldardyń, onyń ishinde orman bólimsheleriniń respýblıkalyq toby bekitildi, onyń quramyna orman sharýashylyǵy bólimshelerin qosa alǵanda 50 myńnan astam adam jáne 11 myń tehnıka kiredi.
Sonymen qatar TJM Azamattyq qorǵaý akademııasynda orman órt sóndirý bólimsheleriniń 360 basshysy aldyn ala oqytyldy.
Osyǵan deıin Oljas Bektenov Abaı oblysynda Tótenshe jaǵdaılardy joıý jónindegi respýblıkalyq jedel shtab otyrysyn ótkizgeni týraly jazdyq.
