TJM byltyrdan beri 7300-den astam nysan men 18 kásiporynnyń jumysyn toqtatty - V. Bojko
ASTANA. 21 mamyr. QazAqparat - Byltyrdan beri Tótenshe jaǵdaılar mınıstrligi qaýipsizdik erejelerin saqtamaǵan 7300-den astam nysan men 18 kásiporynnyń jumysyn toqtatty.
Búgin Parlament Májilisindegi Úkimet saǵatynda baıandama jasaǵan Tótenshe jaǵdaılar mınıstri Vladımır Bojko osylaı málim etti.
Baıandama barysynda vedomstvo basshysy respýblıkanyń qaýipti óndiristerindegi ónerkásiptik qaýipsizdik deńgeıin kóterý mınıstrliktiń únemi baqylaýynda turǵanyn atap ótti.
«Osy baǵytta 2011 jyl men 2012 jyldyń birinshi toqsanynda respýblıka boıynsha 7300-den astam nysan men 18 kásiporynnyń jumysy toqtatyldy. 2885 kásiporyn basshysyna 90 mln. teńgege jýyq aıyppul sanktsııalary salyndy. Tótenshe jaǵdaılarǵa qatysty talaptar boıynsha qaýipti óndiristerdegi 853 birlikti quraıtyn tozyǵy jetken jabdyqtar men 86 tehnologııalyq jeli aýystyryldy. Bıyldyń ózinde jumysshylardyń densaýlyǵy men ómirine qaýip tóndiretin tozyǵy jetken 87 jabdyq aýystyryldy»,-dedi mınıstr.
Onyń aıtýynsha, atalǵan sharalardyń arqasynda elimizdegi apattar sany 8,2 paıyzǵa qysqaryp, ólimge soqtyratyn jaraqattar kórsetkishi 7,4 paıyzǵa, aýyr jaraqat 4,5 paıyzǵa tómendedi.
