TJM bıyl 4 ES-145 tikushaǵyn satyp almaq
ASTANA. QazAqparat - QR Tótenshe jaǵdaılar mınıstrligi aǵymdaǵy jyly 4 ES-145 tikushaǵyn satyp almaq. Bul týraly búgin QR Parlamenti Májilisindegi Úkimet saǵatynda atalǵan vedomstvonyń basshysy Vladımır Bojko málim etti.
Onyń atap ótýinshe, mınıstrlik tez den qoıý kúshteriniń materıaldyq-tehnıkalyq bazasyn nyǵaıtý maqsatynda 2013 jyly 4 ESCh-145 tikushaǵyn, 166 órt sóndirý jáne apattyq qutqarý tehnıkasyn, 2435 baılanys quraly, uıymdastyrý tehnıkasy men tehnıkalyq jabdyq satyp alǵan. «Aǵymdaǵy jyly 4 ES-145 tikushaǵyn, 115 órt sóndirý jáne apattyq qutqarý tehnıkasyn, 2251 baılanys quralyn, uıymdastyrý tehnıkasy men tehnıkalyq jabdyq satyp alýdy josparlap otyrmyz», - dedi ol. V.Bojkonyń aıtýynsha, vedomstvonyń bıýdjeti turaqty túrde artyp keledi. Aǵymdaǵy jyly mınıstrlik bıýdjeti 100 mlrd. teńgeden asyp jyǵyldy.
