TJM bylyǵy: Qyzmetkerler adam qutqarýdyń ornyna bastyǵynyń úıin salǵan
ASTANA. KAZINFORM – Aqmola garnızony áskerı soty tótenshe jaǵdaılar jónindegi burynǵy birinshi vıtse-mınıstr I.Kúlshimbaevqa qatysty úkim shyǵardy. Bul týraly Sybaılas jemqorlyqqa qarsy is-qımyl agenttiginiń resmı ókili Danııar Bıǵaıdarov jýrnalısterge arnalǵan brıfıngide málimdedi.
«Ol Tótenshe jaǵdaılar mınıstrliginiń vedomstvolyq baǵynysty mekemeleriniń basshylyǵyna jeke úıiniń qurylysyna áskerı qyzmetkerler men arnaıy tehnıka tartý týraly zańsyz nusqaý berip, qyzmet babyn asyra paıdalandy dep tanyldy», - dedi D. Bıǵaıdarov.
Sot úkimimen I.Kúlshimbaevqa memlekettik qyzmette jáne kvazımemlekettik sektor sýbektilerinde qyzmet atqarýǵa ómir boıyna tyıym salyna otyryp, 5 jyl merzimge bas bostandyǵynan aıyrý túrindegi jaza taǵaıyndaldy.
Sonymen qatar sot Memleket basshysynyń atyna Kúlshimbaevty general-maıor áskerı ataǵynan aıyrý týraly usynys engizýge qaýly etti.
Úkim zańdy kúshine engen joq.
