TJM bıik ǵımarattardaǵy órt kezinde evakýatsııa erejelerin eske saldy

ASTANA. KAZINFORM – Qazaqstannyń Tótenshe jaǵdaılar mınıstrligi bıik turǵyn jáne ákimshilik ǵımarattarda órt shyqqan jaǵdaıda evakýatsııalaý erejelerin qatań saqtaý qajettigin eskertedi. 

Vedomstvo órttiń alǵashqy mınýttarynda durys áreket etý táýekelderdi aıtarlyqtaı azaıtyp, adamnyń óz ómirin jáne aınalasyndaǵy adamdardyń qaýipsizdigin qamtamasyz etýge múmkindik beretinin atap ótti.

Bıik ǵımarattardaǵy qaýipsizdik erekshe mańyzdy. Tyǵyz qonystaný, kúrdeli arhıtektýra jáne jeldetý júıeleriniń ereksheligi tútinniń jyldam taralýyna ákeledi. Sondyqtan evakýatsııa kezindegi áreketter naqty, aldyn ala oılastyrylǵan jáne tekserilgen bolýy tıis.

TJM evakýatsııalaý boıynsha myna negizgi usynymdardy usynady:

– dúrbeleńge berilmeı, jaǵdaıdy tez baǵalaý;
– esikterdi jaýyp, birden evakýatsııany bastaý (jabyq esikter tútin men órttiń taralýyn baıaýlatady);
– lıftti qoldanbaý – ol toqtap qalýy nemese tútinniń taralý kanalyna aınalýy múmkin;
– tek evakýatsııalyq baspaldaqtardy paıdalaný;
– tútin kezinde edenge jaqyn júrý, sebebi tómengi aımaqta tútin az bolady;
– ot nemese qoıý tútin joldy bógese, bólmeden shyqpaý, esikti jaýyp, sańylaýlardy dymqyl shúberekpen biteý;
– terezege nemese balkonǵa shyǵyp, qutqarýshylardyń nazaryn aýdarý;
– 112 nómirine habarlasyp, naqty mekenjaı men ornalasqan jerdi kórsetý;
– balalarǵa, qarttarǵa jáne múmkindigi shekteýli azamattarǵa aldymen kómektesý.

Mınıstrlik turǵyndardy aldyn ala evakýatsııa josparlarymen tanysýǵa, órt shyǵý joldarynyń ornalasýyn bilýge jáne oqý-jattyǵýlarǵa qatysýǵa shaqyrdy.

Aıta keteıik, Jetisý oblysynda monsha órtenip, 22 adam evakýatsııalandy.