TJM: Bıyl sýǵa ketkenderdiń kóbi tyıym salynǵan jerde kóz jumǵan
ASTANA. KAZINFORM – Qazaqstanda bıylǵy shomylý maýsymynda sýǵa ketýge baılanysty qaıǵyly oqıǵalardyń kóbi shomylýǵa tyıym salynǵan jerlerde tirkelgen. Al mundaı oqıǵalar eń jıi ózenderde bolǵan.
Bul týraly QR Tótenshe jaǵdaılar mınıstrligi Kazinform agenttiginiń resmı saýalyna bergen jaýabynda málim boldy.
Mınıstrliktiń málimetinshe, bıyl shomylýǵa tyıym salynǵan jerlerde 80 adam sýǵa batyp qaza bolǵan. Al resmı shomylý oryndarynda 13 adam kóz jumǵan.
Sý aıdyndary boıynsha alǵanda, qaıǵyly oqıǵalardyń eń kóbi ózenderde tirkelgen. Bıyl ózenderde 48 adam sýǵa ketken. Sý qoımalarynda 22 adam, Kaspıı teńizinde 11 adam, kólderde 9 adam, jasandy sý aıdyndarynda 2 adam, al Nura-Esil kanalynda 1 adam qaza bolǵan.
– Qaıǵyly jaǵdaılardyń negizgi sebepteri – shomylýǵa tyıym salynǵan jerlerde sýǵa túsý, júze bilmeý, óz kúshin durys baǵalamaý, alkogoldik mas kúıde sýǵa túsý jáne balalardy eresekterdiń qaraýynsyz qaldyrý, – delingen mınıstrliktiń jaýabynda.
Qazir elimizde 733 resmı shomylý orny jumys isteıdi. Budan bólek, sýǵa túsýge tyıym salynǵan 5 129 oryn belgilengen.
Mınıstrlik azamattardy tek ruqsat etilgen oryndarda shomylyp, qaýipsizdik talaptaryn qatań saqtaýǵa shaqyrdy.
Eske salaıyq, buǵan deıin Tótenshe jaǵdaılar mınıstrligi jazǵy demalys kezeńinde balalardyń qaýipsizdigin kúsheıtip, elimiz boıynsha sý aıdyndarynda, demalys oryndary men balalar lagerlerinde reıdtik jáne profılaktıkalyq jumystar júrgizilip jatqanyn habarlaǵan bolatyn.
