TJM: Bıyl sýǵa ketken 30 balanyń bári eresekterdiń qaraýynsyz bolǵan
ASTANA. KAZINFORM – Qazaqstanda bıylǵy shomylý maýsymy bastalǵaly sýǵa batyp qaza bolǵan balalardyń barlyǵy eresekterdiń qaraýynsyz bolǵan. Bul týraly QR Tótenshe jaǵdaılar mınıstrligi Kazinform agenttiginiń resmı saýalyna bergen jaýabynda málim boldy.
Mınıstrliktiń málimetinshe, bıyl shomylý maýsymy bastalǵaly elimizdiń sý aıdyndarynda 93 adam sýǵa batyp qaza bolǵan. Onyń 30-y – kámeletke tolmaǵandar.
– Olardyń barlyǵy eresekterdiń qaraýynsyz bolǵan. Balalardy qaraýsyz qaldyrý sýdaǵy qaıǵyly jaǵdaılardyń negizgi sebepteriniń biri sanalady, – delingen mınıstrliktiń jaýabynda.
TJM málimetinshe, qaıǵyly jaǵdaılarǵa shomylýǵa tyıym salynǵan jerlerde sýǵa túsý, júze bilmeý, óz kúshin asyra baǵalaý jáne alkogoldik mas kúıde sýǵa túsý sebep bolady.
Aıta keteıik, mınıstrliktiń málimetinshe, bıyl sýǵa ketkenderdiń kóbi tyıym salynǵan jerde kóz jumǵan.
