Şýchınskidegi jarylys: TJM basshysy zardap shekkenderdiń jaǵdaıyn bildi
ASTANA. KAZINFORM — TJM basshysy zardap shekkenderdiń jaǵdaıyn bildi jáne olarǵa jan-jaqty kómek kórsetýdi tapsyrdy. Bul týraly TJM baspasóz qyzmeti habarlady.
Býrabaı aýdanynda bolǵan órtke baılanysty Tótenshe jaǵdaılar mınıstrliginiń basshylyǵymen vedomstvoaralyq komıssııa jumysyn jalǵastyryp jatyr.
Şýchınsk qalasyna jumys sapary aıasynda Tótenshe jaǵdaılar mınıstri general‑leıtenant Shyńǵys Árinov oqıǵa ornyna baryp, tótenshe jaǵdaıdyń saldaryn joıý jumystarynyń barysymen tanysyp, jedel jáne shuǵyl qyzmetterdiń basshylarynyń baıandamalaryn tyńdady.
TJM basshysy órtten zardap shekken azamattar emdelip jatqan Býrabaı aýdanynyń aýrýhanasyna bardy. Mınıstr patsıentter men medıtsınalyq personalmen áńgimelesip, olardyń jaǵdaıy men emdelý protsesimen tanysty. Barlyq patsıentke qajetti medıtsınalyq kómek tolyq kólemde kórsetilip jatqany jáne olardyń jaǵdaıy dárigerlerdiń turaqty baqylaýynda ekeni atap ótildi.
Mınıstr jaýapty tulǵalarǵa zardap shekkenderdi sapaly emdep, tıisti kútim jáne jan-jaqty qoldaý kórsetý, sondaı-aq olardyń otbasylaryna qajetti psıhologııalyq kómek kórsetý jóninde tapsyrma berdi.
Aýdandyq ákimdikte jergilikti atqarýshy organdardyń, azamattyq qorǵaý qyzmetteriniń, densaýlyq saqtaý júıesi men quqyq qorǵaý qurylymdarynyń ókilderiniń qatysýymen keńes ótti. Kezdesý barysynda zardap shekkender men olardyń otbasylaryna odan ári qoldaý kórsetý, sondaı-aq osyndaı oqıǵalardyń aldyn alý maqsatynda elimizde órt qaýipsizdigi talaptarynyń saqtalýyn kúsheıtý sharalary máseleleri qaraldy.
Vedomstvoaralyq komıssııa jumysy jalǵasýda. Jaǵdaı Tótenshe jaǵdaılar mınıstrliginiń turaqty baqylaýynda.
Eske sala keteıik, buǵan deıin Şýchınskidegi kafede gaz qospasy jarylǵany jóninde jazǵanbyz.
Sonymen qatar, jarylystan zardap shekken 5 adam Kókshetaý aýrýhanasyna aýystyrylǵanyn habarlaǵanbyz.
Sondaı-aq jarylysqa baılanysty qylmystyq is qozǵaldy.
Şýchedegi jarylysta qaza tapqandardyń otbasyna 2 mln teńgeden beriletini habarlandy.
Soynmen qatar Şýchınsk qalasyndaǵy oqıǵany tergeıtin komıssııa quryldy.