TJM balalardyń terezeden qulaý oqıǵalaryna alańdaýshylyq bildirdi

ASTANA. KAZINFORM – Kún jylyna salysymen, sondaı-aq jazǵy mektep demalysy kezinde osyndaı oqıǵalar sany artady, dep jazdy TJM.

Jyl basynan beri vedomstvonyń Strategııalyq josparlaý jáne jedel basqarý komandalyq ortalyǵyna balalardyń terezeden qulaýyna baılanysty 60 jazataıym oqıǵa týraly aqparat túsken. Bes bala oqıǵa ornynda qaza tapsa, 55 bala túrli jaraqat alyp, medıtsınalyq mekemelerge jetkizildi.

- Byltyr osyndaı 196 oqıǵa tirkeldi. Ádette, táýekel aımaǵynda - eresekterdiń qaraýynsyz qalǵan 2 jastan 13 jasqa deıingi balalar. Kóbinese qaıǵyly oqıǵalar balalar moskıt torlaryna súıengen kezde oryn alady, sebebi bul torlar salmaqqa shydamaıdy, - deıdi TJM resmı ókili Dınara Nurǵalıeva.

Vedomstvo basshysynyń tapsyrmasy boıynsha elimizdiń barlyq óńirlerinde profılaktıkalyq jumystar kúsheıtildi. Qutqarýshylar ata-analarmen kezdesý kezinde jáne balalar mekemelerinde reıdter, profılaktıkalyq is-sharalar ótkizedi.

Azamattardyń táýekelder týraly habardarlyǵyn arttyrý úshin aqparattyq resýrstar belsendi túrde tartylýda.

Tótenshe jaǵdaılar mınıstrligi barlyq ata-analar men balalardyń zańdy ókilderin tómendegi qaýipsizdik sharalaryn qatań saqtaýǵa shaqyrady:

• Balalardy qaraýsyz qaldyrmańyz;
• Moskıt torlaryna senbeńiz — olar balany ustap qalmaıdy;
• Terezelerge arnaıy bekitkishter men blokatorlardy ornatyńyz;
• Bala tereze aldyna shyǵa almas úshin, tereze mańyndaǵy jıhazdardy alyp tastańyz.

- Árbir qaıǵyly oqıǵanyń aldyn alýǵa bolady.

Balalardyń ómiri men densaýlyǵy úshin jaýapkershilik eresekterge júkteledi, - dep tolyqtyrdy resmı ókil.

Aıta keteıik, Óskemende balalardy terezeden qulaýdan saqtandyrý úshin drondar qoldanylyp jatyr.